Իսրայելը նոր գործողություն է սկսել՝ ի պատասխան պաղեստինյան կողմի հրթիռակոծումների

Իսրայելի պաշտպանության բանակը հայտարարել է պաղեստինյան «ՀԱՄԱՍ» խմբավորման դեմ ռազմական գործողության մեկնարկի մասին։ Պատճառը, ըստ իսրայելական կողմի, Գազայի հատվածից իրենց ուղղված հրթիռային չդադարեցվող հարվածներն են։ 
Ինչպես հաղորդում է իսրայելական The Jerusalem Post պարբերականը, գործողությունը կրում է «Պաշտպանության սահմանը» (Protective Edge) պայմանական անվանումը։ ՑԱԽԱԼ-ից փոխանցել են՝ սույն գործողությունը «հաստատապես վերջ է դնելու Իսրայելի քաղաքացիների դեմ ուղղված ահաբեկչությանը»։ Գործողության հիմնական նպատակը, ըստ աղբյուրի, պաղեստինյան զինյալների պատսպարանների ոչնչացումն է։

Նկատենք, որ իսրայելցի զինվորականների խոսքերով՝ միայն վերջին 2 օրերի ընթացքում պաղեստինյան կողմից իրենց ուղղությամբ արձակվել է ավելի քան 80 հրթիռ, որոնցից մի մասը չեզոքացվել է իսրայելական «Երկաթե գմբեթ» (Iron Dome) հակօդային պաշտպանության համակարգով, որը նախատեսված է փոքր հեռահարության՝ մինչև 70 կմ հրթիռների համար, իսրայելական եռաստիճան հակահրթիռային պաշտպանության առաջին բաղադրիչն է է։

Բացի այդ, հաշվի առնելով սրված իրավիճակը՝ ՑԱԽԱԼ-ը հայտարարել է ՀՕՊ քաղաքացիական պաշտպանության պահեստազորի ավելի քան 100 անդամների, ինչպես և շտաբային աշխատակիցների մոբիլիզացիա։ Ավելին, կառավարությունը թույլատրել է ևս 1.5 հազար հոգու մոբիլիզացումը։

Հիշեցնենք, որ ըստ փորձագետների՝ Իսրայելի ակտիվությունը կապված է 3 իսրայելցի պատանիների սպանության հետ։ Հունիսի 12-ին նրանց առևանգել էին, Իսրայելը նույն օրն առևանգման պատասխանատու էր հայտարարել «ՀԱՄԱՍ»-ին։ Ավելին, հունիսի 26-ին Իսրայելի անվտանգության համընդհանուր ծառայությունը հրապարակել էր «ՀԱՄԱՍ»-ի 2 ակտիվիստների լուսանկարները և տվյալները, որոնք, ըստ իսրայելական կողմի, մեղավոր են առևանգման հարցում։
Օրեր անց պատանիների դիերը հայտնաբերել էին Հորդանան գետի արևմտյան ափին՝ Հևրոն քաղաքից դեպի հյուսիս ընկած հատվածում։ «ՀԱՄԱՍ»-ը հերքել է, թե իր անդամները որևէ առնչություն ունեն պատանիների սպանության հարցում։

Այնուհանդերձ, Իսրայելի ուժայիններն այդ օրվանից ի վեր մի շարք գործողություններ են իրականացրել, որոնք արդյունքում ձերբակալվել է 400 արաբ, որոնց շարքում են «ՀԱՄԱՍ»-ի անդամներ, պաղեստինցի քաղաքական գործիչներ։

Բացի այդ, ձերբակալվել են 57 պաղեստինցիներ, որոնց 2011-ին ազատ էին արձակել իսրայելցի առևանգված զինծառայող Հիլադ Շալիթի ազատման դիմաց։ Իսրայելի զինծառայողներն այս ընթացքում խուզարկել են մոտ 3 հազար շինություններ, այդ թվում՝ հեռուստաընկերությունների ու թերթերի գրասենյակներ։
Նշենք, որ իսրայելցի պատանիների սպանությունը դատապարտել է նաև ՄԱԿ գլխավոր քարտուղար Բան Կի-Մունը՝ այն որակելով «Իսրայելի և Պաղեստինի հարաբերությունների սրմանն ուղղված սադրանք»։