Արաբական երկրները Եմենի «Վճռական փոթորիկ» գործողությունը փոխարինել են «Վերականգնված հույսով»

Սաուդյան Արաբիայի գլխավորած արաբական կոալիցիան երեկ՝ մարտի 21-ին հայտարարել է, որ իրենք ավարտել են Եմենում արդեն գրեթե մեկ ամիս շարունակվող «Վճռական փոթորիկ» ռազմական գործողությունը, սակայն շարունակելու են ուշադրության տակ պահել ու վերահսկել իրանամետ շիա հութիների գործողությունները Եմենում: Այս մասին հայտնում է բրիտանական Reuters լրատավական գործակալությունը՝ հղում անելով Սաուդյան Արաբիայից հեռարձակվող Arabiya TV հեռուստաալիքին:

«Վճռական փոթորիկ» ռազմական գործողությունից հետո

Կոալիցիան հայտարարել է, որ իրենք կատարել են իրենց առջև դրված ռազմական խնդիրը, հեռացրել են ռազմական վտանգը Սաուդյան Արաբիայի և մյուս հարևան պետությունների սահամններից և այժմ մտնում են քաղաքական փուլ՝ կենտրոնանալով անվտանգության, հակաահաբեկչական պայքարի և Եմենին օգնություն տրամադրելու ու առկա խնդիրներին քաղաքական լուծում տալու վրա: Նոր գործողությունը, ինչպես նշվել է կոալիցիայի տարածած հայտարարությունում, կոչվում է «Վերականգնված հույս»:

Արաբական կոալիցիայի խոսնակ, գեներալ Ահմեդ Ասսերին հայտարարել է, որ նոր գործողությունն արդեն իսկ սկսել է և այն քաղաքական, դիվանագիտական և ռազմական գործողությունների համադրություն է:

Հիշեցնենք, որ փետրվարին իրանամետ հութիներն իշխանությունից հեռացրել էին երկրի նախագահ Աբդ-Ռաբբա Մանսուրա Հադին: Մարտի 24-ին Հադին ռազմական աջակցության խնդրանքով դիմել էր ՄԱԿ-ին: Սակայն չսպասելով ՄԱԿ ԱԽ համապատասխան որոշման՝ Սաուդյան Արաբիան ու Պարսից ծոցի արաբական 9 երկրներ մարտի 26-ին ռազմական գործողություններ էին սկսել Եմենում։

Հատկանշական է, որ հութիների առաջխաղացումը արաբական կոալիցիան պայմանավորում է վերջիններիս տրամադրվող իրանական օժանդակությամբ: Արաբական կոալիցիայի խոսնակ, գեներալ Ահմեդ Ասսերին մարտի 29-ին հայտարարել է, թե հութիների շարքում կռվում է 25-30 հազար զինյալ: Վերջիններս օրական ստանում են 100 ամերիկյան դոլարի չափ գումար, որը ևս ֆինանսավորվում է Իրանից: Ասսերին նաև նշել է, թե երբ ֆինանսավորումը դադարեցվի, հութիներից շատերը կհրաժարվեն կռվել: Թեև թե´ հութիները, թե´ Իրանը հերքում են այս լուրերը, նշենք, որ իրանական իշխանություններին բազմիցս մեղադրել են Եմենի հութի շիական ցեղերին օգնելու համար, քանի որ այս տարածաշրջանում վերջիններս ունեն իրենց ուրույն շահերը: