Թուրքիայի ԶՈւ ստորաբաժանումները Անկարայից և Ստամբուլից դուրս կտեղակայվեն

Թուրքիայում ռազմական հեղաշրջման փորձից հետո Ստամբուլում և մայրաքաղաք Անկարայում տեղակայված զինվորական ստորաբաժանումները տեղափոխվելու են քաղաքներից դուրս: Այս մասին այսօր՝ օգոստոսի 12-ին,  «Հաբերթուրք» հեռուստաալիքին տված հարցազրույցի ժամանակ հայտնել է Թուրքիայի պաշտպանության նախարար Ֆիքրի Ըշըքը:

Նա նաև հայտնել է, որ արդեն սկսել են որոշ ստորաբաժանումների տեղափոխման աշխատանքները և հավելել է, որ մինչև սեպտեմբերի կես նախատեսում են տեղափոխել բոլոր այն ստորաբաժանումները, որոնց նկատմամբ այդպիսի որոշում է կայացվել:

Զորամասերի տեղափոխվելուց հետո այդ տարածքները հանձնվելու են ժողովրդի շահագործմանը և կարող են վերածվել այգիների, կամ հասարակական այլ վայրերի:

Թուրքիայի պաշտպանության նախարարը հայտնել է նաև, որ ռազմօդային ուժերի ենթակայության տակ գտնվող Աքընջը ավիաբազայի փոխարեն, որը համարվում է հուլիսի 15-ի ռազմական հեղաշրջման փորձի հիմնական կենտրոններից մեկը, հնարավոր է, որ այգի ստեղծվի: Նշենք, որ հուլիսի 29-ին Թուրքիայի վարչապետ Բինալի Յըլդըրըմը Անկարայի Կազան գավառ այցելության ժամանակ հայտարարել է, որ փակվելու է Թուրքիայի Աքընջը ավիաբազան և այն բոլոր զորանոցները, որտեղից դուրս են եկել տանկերն ու ուղղաթիռները հեղաշրջման փորձի ժամանակ:

Հարցին, թե արդյոք հնարավոր է, որ Թուրքիայի ԶՈւ գլխավոր շտաբի շենքը ևս Անկարայից դուրս տեղակայվի, Ֆիքրի Ըշըքը հայտնել է, որ այժմ քննարկվում է երկրի պաշտպանության նախարարությունը նոր շենք տեղափոխելու հարցը, բայց մոտ ապագայում հնարավոր է տեղափոխվի նաև գլխավոր շտաբը:

Նշենք, որ ավելի վաղ՝ օգոստոսի 3-ին, Թուրքիայի վարչապետ Բինալի Յըլդըրըմը հայտարարել էր, որ ԶՈւ գլխավոր շտաբը տեղափոխվելու է Անկարայից:

Ըշըքը հայտնել է, նաև որ մինչև այժմ փախուստի մեջ է գտնվում 162 զինծառայող և զինված ուժերից էլ հեռացվել է 3,185 մարդ, որից 151-ը գեներալ և ծովակալ: Սակայն ըստ Թուրքիայի ներքին գործերի նախարար Էֆքան Ալայի՝  այս պահին դեռևս փախուստի մեջ են գտնվում 190 զինվորական, այդ թվում՝ 9 գեներալ, 96 ոստիկան, որոնիցի 47-ը՝ ոստիկանության տարբեր բաժանմունքների ղեկավարներ:

Հիշեցնենք, որ հուլիսի 15-ին Թուրքիայում ռազմական հեղաշրջման անհաջող փորձ է կատարվել, ինչից հետո ձերբակալվել են Թուրքիայի զինված ուժերի բազմաթիվ զինծառայողներ: Հեղաշրջման փորձին մասնակցելու, այն ղեկավարելու մեղադրանքով հուլիսի 22-ի դրությամբ կալանավորվել է Թուրքիայի ԶՈւ 119 գեներալ և ծովակալ, այդ թվում նաև Աքընջըի 4-րդ ավիաբազայի հրամանատար, գեներալ-մայոր Հաքան Էվրիմը:

Թուրքիայում ռազմական հեղաշրջման փորձի վերաբերյալ տեղեկություն կարող եք ստանալ հետևյալ հոդվածներում:

• Հեղաշրջման փորձից հետո Թուրքիայի ԶՈւ-ում նոր զինվորականներ են նշանակվել բարձր պաշտոնների
• Չստացված հեղաշրջումից հետո Թուրքիայում վերադասավորում են ուժային կառույցները
• Թուրքիայում ռազմական հեղաշրջման փորձին մասնակցել է ԶՈւ 8651 զինծառայող 
• Թուրքիայի ԶՈւ գեներալակազմի 1/3-ը կալանավորվել է հեղաշրջման փորձի համար
• Թուրքիայում ռազմական հեղաշրջման փորձից հետո շուրջ 300 սպանված, 1500 վիրավոր
• Հեղաշրջման փորձ Թուրքիայում․ իշխանության ուժերը հայտնում են, որ այն ճնշվել է
• Թուրքիայում ռազմական հեղաշրջման փորձում գլխավոր դերում ժանդարմերիան է