Թուրքիայում մոտ 7000 ոստիկան շրջափակել են «Ինջիրլիք» ռազմաբազան

Հուլիսի 31-ի գիշերը Թուրքիայի ոստիկանությունը շրջափակել է երկրի հարավ-արևմուտքում՝ Ադանա քաղաքի մոտակայքում տեղակայված «Ինջիրլիք» ռազմաբազան: Այս մասին հայտնում է թուրքական «Հյուրիեթ» պարբերականը: 

Թուրքիայում ոստիկանները շրջափակել են «Ինջիրլիք» ռազմաբազան:

Թուրքիայում ոստիկանները շրջափակել են «Ինջիրլիք» ռազմաբազան:

Ավելի ուշ Թուրքիայի՝ Եվրամիության հարցերով նախարար Օմեր Չելիքը Twitter-ի իր միկրոբլոգում հայտնել է, որ ավիաբազայում «անվտանգության վիճակի հերթական ստուգում է» և ոչ մի արտակարգ դրություն չկա:

Սակայն ասեկոսներ կան, որ դա արվել է Թուրքիայում երկրորդ հնարավոր ռազմական հեղաշրջման փորձը կանխելու համար: Ըստ «Հյուրիեթ» պարբերականի՝ մոտավորապես 7000 ոստիկանն անվտանգության միջոցառումներ ձեռնարկելու համար ուղարկվել են Ադանայի անվտանգության ծառայություն, նահանգապետարան և օդանավակայան: Բացի այդ ավիաբազա են ուղարկվել զրահամեքենաներ և ջրցան մեքենաներ:

Նշենք, որ հուլիսի 29-ին Թուրքիայի վարչապետ Բինալի Յըլդըրըմը Անկարայի Կազան գավառ այցելության ժամանակ հայտարարել է, որ փակվելու է Թուրքիայի ռազմօդային ուժերի ենթակայության տակ գտնվող Աքընջը ավիաբազան, քանի որ այն եղել է հուլիսի 15-ի ռազմական հեղաշրջման փորձի հիմնական կենտրոններից մեկը: Այս մասին հայտնել է թուրքական «Անադոլու» գործակալությունը:

Թուրքիայի վարչապետը հայտարարել է նաև, որ փակվելուն են այն բոլոր զորանոցները, որտեղից դուրս են եկել տանկերն ու ուղղաթիռները հեղաշրջման փորձի ժամանակ:

Հիշեցնենք, որ հուլիսի 15-ին Թուրքիայում ռազմական հեղաշրջման անհաջող փորձ է կատարվել, ինչից հետո ձերբակալվել են Թուրքիայի զինված ուժերի բազմաթիվ զինծառայողներ: Հեղաշրջման փորձին մասնակցելու, այն ղեկավարելու մեղադրանքով հուլիսի 22-ի դրությամբ կալանավորվել է Թուրքիայի ԶՈւ 119 գեներալ և ծովակալ, այդ թվում նաև Աքընջըի 4-րդ ավիաբազայի հրամանատար, գեներալ-մայոր Հաքան Էվրիմը:

Թուրքիայում ռազմական հեղաշրջման փորձի վերաբերյալ տեղեկություն կարող եք ստանալ հետևյալ հոդվածներում: