Ռազմաշաբաթ․ Հայաստան․ 13-19 սեպտեմբերի, 2015

Օգոստոսի 15-ին Տաջիկստանի մայրաքաղաք Դուշանբեում Հայաստանը Տաջիկստանից ստացել է ՀԱՊԿ-ում նախագահության հերթափոխը։ Նույն օրը՝ ՀԱՊԿ հավաքական անվտանգության խորհրդի նիստի ժամանակ Հայաստանի նախագահության առաջնահերթությունները ներկայացնելիս, ՀՀ նախագահ Սերժ Սարգսյանը հայտնել է, որ «Անքակտելի եղբայրություն» զորավարժությունից բացի (2015թ սեպտեմբեր-հոկտեմբեր), Հայաստանում նախատեսվում է անցկացնել նաև ՀԱՊԿ «Կոբալտ-2016» զորավարժությունը։ Նախագահը նաև առաջարկել է ՀՀ ԶՈւ խաղաղապահ բրիգադի հիմքի վրա ստեղծել ՀԱՊԿ հավաքական խաղաղապահ ուժերի ուսումնական կենտրոն։ Նախագահ Սարգսյանը ՀԱՊԿ անդամ պետությունների ղեկավարներին տեղեկացրել է նաև Հարավային Կովկասի իրավիճակի մասին՝ ուշադրությունը սևեռելով հայ-ադրբեջանական սահմանի երկայնքով և ղարաբաղա-ադրբեջանական շփման գծում լարվածության բարձրացման վրա:

Սեպտեմբերի 15-ից 19-ը Պաշտպանության բանակի կենտրոնական ենթակայության զորամասերի հետ անցկացվել է երկաստիճան քառափուլ հրամանատարաշտաբային զորավարժություն, որին ներգրավված էին մասնակից զորամասերի հրամկազմը, շտաբները, ղեկավարման և ապահովման մարմինները։

Սեպտեմբերի 18-ին Հայաստանի պաշտպանության նախարարության վարչական համալիրում անցկացվել է աշխատանքային խորհրդակցություն՝ նվիրված ՊԲ-ում կատարված աշխատանքների արդյունքների քննարկմանը:

Արցախի ղեկավար Բակո Սահակյանը սեպտեմբերի 12-ին այցելել է Արցախի հյուսիսային սահմանագծերից մեկը, տեղում ծանոթացել զինվորների ծառայության ընթացքին և տիրող իրավիճակին: Իսկ սեպտեմբերի 14-ին այցելել է ՊԲ հարավարևելյան սահմանագծերից մեկը:

Սեպտեմբերի 15-ից 18-ն ընկած ժամանակահատվածում ՆԱՏՕ-ի «Գործընկերություն հանուն խաղաղության» ծրագրի Օպերատիվ կարողությունների հայեցակարգի շրջանակներում Հայաստանում անցկացվում է ՀՀ ԶՈւ Խաղաղապահ բրիգադի մեկ հրաձգային գումարտակի ՕԿՀ 2-րդ մակարդակի գնահատում, ինչի համար ստորաբաժանումն անցկացնում է զորավարժություն:

ՀՀ պաշտպանության նախարար Սեյրան Օհանյանը սեպտեմբերի 17-ին եղել է Դիլիջանում գործող ՀՀ ՊՆ «Լեռնային Հայաստան» առողջարանում, հրավիրված խորհրդակցության ընթացքում համապատասխան ցուցումներ և հանձնարարականներ տվել առողջարանի պայմանները բարելավելու, տարածքի որոշ հատվածներում անհրաժեշտ նորոգումներ իրականացնելու, անհրաժեշտ գույքով ապահովելու և հանգստացողների ժամանցն առավել հարմարավետ կազմակերպելու համար։