Ռուսաստանի զինված ուժերի ավիացիոն ստորաբաժանումները 2019 թվականին ստացել են 139 միավոր նոր կամ արդիականացված ավիացիոն միջոց։ Բացի այս, «Սուխոյ» ընկերության արտադրած Սու–57 կործանիչը իրական մարտական պայմաններում կրկին փորձարկվել է Սիրիայում։
Այս մասին հայտնել է ՌԴ ԶՈւ գլխավոր շտաբի պետ, բանակի գեներալ Վալերի Գերասիմովը։ Գեներալի խոսքերը փոխանցում է ՌԴ ՊՆ «Կռասնայա զվեզդա» թերթը։
Սու–57 կործանիչը դեռևս 2018 թվականին հասցրել էր մարտական պայմաններում փորձարկվել Սիրիայում։ Նոր փորձարկման պատճառների մասին ԳՇ պետը ոչինչ չի հայտարարել։ Հիշեցնենք, որ 2019–ի հունիսին ՌԴ ՊՆ–ն և «Սուխոյ» գործարանը 76 միավոր Սու–57–ի մատակարարման պայմանագիր են կնքել, ինչպես նաև նախատեսվում էր, որ մինչև տարեվերջ ռուսական բանակը պիտի համալրվի 2018 թվականի պայմանագրով նախատեսված 2 փորձնական կործանիչներից մեկով։
Գերասիմովը նաև հայտնել է, որ հեռահար ավիացիայի ոլորտում շարունակվում են Տու-160 և Տու-95ՄՍ հրթիռակիրների արդիականացումը, իսկ Տու-160Մ մարտավարական ռմբակոծիչները դրվել են սերիական արտադրության։
2019 թվականին ռուսական բանակի տեխնիկական համալրումների մի մասի՝ այդ թվում ավիացիոն միջոցների համալրումների մասին կարող եք կարդալ այս հոդվածներում (1,2,3,4,5,6)։