Ռուսաստանում ընթացող «Բանակ–2019» միջազգային 5–րդ ռազմատեխնիկական ֆորումի ընթացքում Ռուսաստանի ՊՆ–ն մի շարք պայմանագրեր է կնքել ավիացիոն միջոցներ արտադրող ընկերությունների հետ, որոնցով ձեռք է բերելու Սու–57 կործանիչներ, Մի–28ՆՄ և Մի–8ԱՄՏՇ–ՎՆ ուղղաթիռներ։
«ՌԻԱ Նովոստի» լրատվական գործակալության փոխանցմամբ՝ Ռուսաստանի առևտրի և արդյունաբերության նախարար Դենիս Մանտուրովը հայտնել է, որ պաշտպանական գերատեսչության և «Սուխոյ» գործարանի միջև 76 միավոր Սու–57 կործանիչների գնման պայմանագիրը ստորագրվել է։
Հիշեցնենք, որ Ռուսաստանի նախագահը հանձնարարել էր մինչև 2028 թվականը կազմավերել 3 ավիագունդ, որոնց հիմանական սպառազինությունը կլինի Սու–57 կործանիչը։ Ներկայումս սպասվում է, որ մինչև տարեվերջ ՊՆ–ն կստանա 2018 թվականին կնքած պայմանագրով առաջին Սու–57–ը։ Սու–57–երը Սիրիայում մարտական փորձ են ձեռք բերել։
ՌԴ պաշտպանության փոխնախարա Ալեքսեյ Կրիվարուչկոն էլ հայտնել է մեկ այլ պայմանագրի կնքման մասին, որով «Ռուսաստանի ուղղաթիռներ» հոլդինգը կմատակարարի 98 միավոր Մի–28ՆՄ ուղղաթիռ։ Այս գործարքը նույնպես Ռուսաստանի նախագահի հանձնարարականն է, և ուղղաթիռների համալրումը սպառազինություն նախատեսվում է ավարտել մինչև 2027 թվական։
Ռուսաստանի ՊՆ–ի և արտադրողի միջև Մի–28ՆՄ ուղղաթիռների գնի շուրջ տարաձայնություններ կային և մարտին Կրիվարուչկոն հայտարարել էր, որ ուղղաթիռների առաջին խմբաքանակը կլինի 6 կամ 18 միավոր։
«Ռուսաստանի ուղղաթիռներ» հոլդինգը մեկ այլ պայմանագրով պաշտպանության նախարարությանը 2020–2021 թվականների ընթացքում կփոխանցի 10 միավոր Մի–8ԱՄՏՇ–ՎՆ ուղղաթիռ։ Նշված 2 ուղղաթիռներն էլ արդիականացվել են սիրիական փորձով։
«ՏԱՍՍ» գործակալության փոխանցմամբ՝ «Բանակ–2019» ֆորումի ընթացքում Ռուսաստանի ՊՆ–ն պետպատվերի շրջանակներում արդեն կնքել է 27 արտադրող ընկերությունների հետ 46 պայմանագիր, որոնց ընդհանուր արժեքը մոտ 1 տրիլիոն ռուբլի է (ներկայիս փոխարժեքով՝ մոտ 15,8 միլիարդ դոլար)։ Վերը նշված պայմանագրերի մասին առավել մանրամասն կանդրադառնանք շուտով։