Հակառակորդը սրել է առաջնագծի իրավիճակը, հայկական կողմից վիրավորվել է 2 քաղաքացի • Նախագահը մասնակցել է ՀՀ ԶՈւ օպերատիվ հավաքների մեկնարկին • Պաշտպանության նախարարն այցելել է Նախիջևանի սահման • ԱԺ ներկայացուցիչներն այցելել են Տավուշի սահմանային դիրքեր, սահմանամերձ գյուղեր • ՀՀ ԶՈւ-ն երկու զինծառայող է կորցրել • Կաշառակերության երկու դեպք է բացահայտվել • Վարժանքներ են սկսվել ՌԴ 102-րդ ռազմաբազայում
• Մարտի 25-26-ին Ադրբեջանը Հայաստանի սահմանի ամբողջ երկայնքով, այդ թվում և ՊԲ պատասխանատվության գոտում, ինտենսիվորեն կիրառվել է ինչպես հրաձգային զենքեր, այնպես էլ 60 և 82 մմ-ոց ականանետներ և TR-107 համազարկային կրակի ռեակտիվ կայաններ: Կրակոցներից և արկակոծումից վիրավորվել են քաղաքացիականներ՝ Տավուշի Բերքաբեր գյուղի բնակիչ Նորիկ Ալիխանյանը և Արցախի Թաղավարդ գյուղի բնակիչ Երվանդ Կարոյի Փիրումյանը։
• Մարտի 21-ին ՀՀ ՊՆ-ում սկսվել են ՀՀ ԶՈւ ղեկավար կազմի օպերատիվ հավաքները, որոնց մեկնարկին ներկա է եղել նախագահ Սերժ Սարգսյանը։ Հավաքների նպատակն է կատարելագործել հրամանատարների ու նրանց շտաբների տեսական և գործնական ունակությունները, ռազմավարական և օպերատիվ-մարտավարական օղակների կառավարման մարմինների ներդաշնակության աստիճանը:
«Տարեվերջին ՀՀ զինված ուժերը ստացան որակապես նոր սպառազինություն և հետագա մատակարարման երաշխիքներ: Էլ ավելի կարևոր է, որ մշակել եք ձեր օգտագործած եզրույթով՝ «զինված դիմակայությունը զսպելու» նոր հայեցակարգ», — իր ելույթում ասել է նախագահ Սարգսյանը։
• Մարտի 23-ին ՀՀ պաշտպանության նախարար Սեյրան Օհանյանն այցելել է 5-րդ բանակային կորպուսի ստորաբաժանումներ, ծանոթացել սահմանագոտու տվյալ հատվածի օպերատիվ իրավիճակին, ինժեներական և ամրաշինական կառույցների վիճակին, ինչպես նաև ստուգել նախորդ այցերի ժամանակ տրված հանձնարարականների կատարման ընթացքը։
• Մարտի 19-ին ՀՀ ԱԺ ՊԱԱՆԳ հանձնաժողովի պատվիրակությունն այցելել է Տավուշի սահմանային դիրքեր, սահմանամերձ գյուղեր՝ քաղաքացիական և տարածքային պաշտպանության շրջանակներում սահմանամերձ համայքների բնակչության ընդհանուր պաշտպանվածության աստիճանը գնահատելու, ԶՈւ մարտական պատրաստականությանը ծանոթանալու համար։
• Մարտի 24-ին ՀՀ ՊՆ զորամասերից մեկի հրաձգարանում ճակատին ստացած հրազենային վիրավորումից հիվանդանոց տեղափոխվելու ճանապարհին մահացել է ժամկետային զինծառայող Սևակ Համբարձումյանը:
• Մարտի 22-23-ի գիշերը Մասիս-Էջմիածին ճանապարհին ավտովթարի պատճառով մահացել են ՀՀ ԶՈւ ժամկետային զինծառայող Արսեն Հովսեփյանը և մեքենայի մյուս երկու ուղևորները։
• ՀՀ քննչական կոմիտեում քննվող քրեական գործով մեղադրանքներ են առաջադրվել ՀՀ ՊՆ վերահսկիչ վարչության ընդհանուր վերահսկման բաժնի պետ Սամվել Խաչատրյանին և ՀՀ ՊՆ ՆՏԱ դեպարտամենտի տեխնիկական ապահովման վարչության գլխավոր մասնագետ Արսեն Ղարիբջանյանին՝ ընկերությունից 5 մլն դրամ կաշառք ստանալու և դրա դիմաց խախտման մասին չհայտնելու համար:
• ՀՀ քննչական կոմիտեում քննվող քրեական գործով մեղադրանք է առաջադրվել բուժծառայության կապիտան Աշոտ Սիմոնյանին՝ ժամկետային զինծառայողին հոսպիտալ ստացիոնար բուժման ընդունելու դիմաց կաշառք ստացանալու համար։
• ՌԴ ԶՈւ՝ Հայաստանում տեղակայված ռազմաբազայի տանկային, մոտոհրաձգային, հրետանային, զենիթահրթռիային և հատուկ նշանակության ստորաբաժանումների շուրջ 600 զինծառայող վաշտային մարտավարական մեկամսյա վարժանքներ է սկսել Հայաստանի «Ալագյազ» զորավարժարանում: Ռազմաբազայի ևս 300 հետախույզ զինծառայող «Փամբակ» զորավարժարանում սկսել է մարտավարական հատուկ վարժանքներ:
Հայաստանի նախորդ ռազմաշաբաթն այստեղ։