Առանձնապես խոշոր չափի կաշառք ստանալու համար մեղադրվում է ՀՀ ՊՆ երկու աշխատակից

ՀՀ քննչական կոմիտեի զինվորական քննչական գլխավոր վարչության ՀԿԳ քննության վարչության վարույթում քննվող քրեական գործով մեղադրանքներ են առաջադրվել ՀՀ ՊՆ վերահսկիչ վարչության ընդհանուր վերահսկման բաժնի պետ, գնդապետ Սամվել Խաչատրյանին` առանձնապես խոշոր չափերով կաշառք ստանալու և ՀՀ ՊՆ ՆՏԱ դեպարտամենտի տեխնիկական ապահովման վարչության գլխավոր մասնագետ Արսեն Ղարիբջանյանին՝ առանձնապես խոշոր չափերով կաշառք ստանալուն օժանդակելու համար: Այս մասին ՀՀ քննչական կոմիտեն հայտնել է մարտի 19-ին:

Նախնական քննությամբ պարզվել է, որ գնդապետ Խաչատրյանը 2015թ. դեկտեմբերին ծառայության բերումով տեղեկացել է, որ ՍՊ ընկերությունը 06.11.2015թ ՀՀ ՊՆ հետ կնքած ձառայությունների գնման պայմանագրի կատարման արդյունքում ստացել է գերշահույթ, ինչի կապակցությամբ վերադասի հանձնարարությամբ որոշակի ստուգողական գործողություններ է իրականացրել։

Ընկերության գերշահույթ ստանալու վերաբերյալ ստուգման արդյունքներն իր լիազորությունների շրջանակում վերադասին բարենպաստ կերպով զեկուցելու կամ իր պաշտոնեական դիրքն օգտագործելով ստուգման վերաբերյալ նյութերն իրավապահներին չուղարկելուն նպաստելու դիմաց, ըստ ձեռք բերված ապացույցների, գնդապետը գլխավոր մասնագետ Ղարիբջանյանի միջոցով ՍՊ ընկերության տնօրենից 2016թ. մարտի սկզբին պահանջել է առանձնապես խոշոր չափերով` 5 միլիոն ՀՀ դրամ գումար կաշառք:

Քննությամբ բավարար ապացույցներ են ձեռք բերվել առ այն, որ Ղարիբջանյանը պատրաստակամություն է հայտնել՝ իր գործողություններով օժանդակելու Խաչատրյանին: Այդ նպատակով 2016 թվականի մարտի սկզբին հանդիպել է ընկերության տնօրեն Ավագյանին և հայտնել գնդապետի՝ 5 մլն ՀՀ դրամ գումար կաշառք ստանալու պահանջը, իսկ մարտի 15-ին ՀՀ ՊՆ վարչական համալիրի մոտակայքում անձամբ հանդիպել է նրան և ստացել պահանջված գումարը:

Ձեռք բերված ապացույցների հիման վրա՝ ՀԿԳ ավագ քննիչը մարտի 18-ին վերահսկիչ վարչության ընդհանուր վերահսկման բաժնի պետ, գնդապետ Սամվել Խաչատրյանին մեղադրանք է առաջադրել ՀՀ քրեական օրենսգրքի 311-րդ հոդվածի 4-րդ մասի 2-րդ կետով (պատժվում է ազատազրկմամբ՝ յոթից տասներկու տարի ժամկետով՝ գույքի բռնագրավմամբ կամ առանց դրա), գլխավոր մասնագետ Արսեն Ղարիբջանյանին՝ ՀՀ քրեական օրենսգրքի 38311 հոդվածի 4-րդ մասի 2-րդ կետով(պատժվում է ազատազրկմամբ՝ յոթից տասներկու տարի ժամկետով՝ գույքի բռնագրավմամբ կամ առանց դրա):

Նույն օրը միջնորդություններ են ներկայացվել Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան՝ մեղադրյալների նկատմամբ կալանավորումը որպես խափանման միջոց ընտրելու մասին, որոնք բավարարվել են:

Նախաքննությունը շարունակվում է:

Հիշեցնենք, որ ավելի վաղ՝ մարտի 15-ին, ՀՀ ՊՆ-ն տեղեկացրել էր, որ ՀՀ ՊՆ ռազմական ոստիկանության Հատուկ օպերատիվ ծառայության ձեռնարկած օպերատիվ-հետախուզական միջոցառումների արդյունքում մարտի 15-ին, առանձնակի խոշոր չափի կաշառք ստանալու պահին (5 մլն ՀՀ դրամ), ձերբակալվել է ՀՀ ՊՆ ՆՏԱ դեպարտամենտի աշխատակից Արսեն Շիրինի Ղարիբջանյանը:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *