Ղազախստանը Ռուսաստանից անվճար ստացել է Ս-300ՊՍ համակարգեր

Ղազախստանի զինված ուժերը Ռուսաստանի պաշտպանության նախարարությունից անվարձահատույց ստացել է Ս-300ՊՍ զենիթահրթիռային համակարգերի 5 համալիր: Այս մասին օգոստոսի 12-ին հայտնում է Ղազախստանի պաշտպանության նախարարության կայքը:

Ս-300ՊՍ զենիթահրթիռային համակարգ. նկարը Ղազախստանի ՊՆ կայքից

Զենիթահրթիռային համակարգերը Ղազախստանում անցնելու են փորձարկումներ, ինչից հետո համալրելու են երկրի զինված ուժերի հակաօդային պաշտպանության համակարգը:

Ռուսաստանի և Ղազախստանի միջև նախատեսված գործարքի մասին հայտնի էր դարձել 2014-ի հունվարին: Այն ժամանակ նշվում էր, որ Ռուսաստանը Ղազախստանին անվարձահատույց կփոխանցի 5 դիվիզիոն Ս-300ՊՍ զենիթահրթիռային համակարգեր։ Զինտեխնիկան Աստանային նախատեսվում էր տրամադրել Ռուսաստանի զինված ուժերի սպառազինության պահեստներից։ (Նշենք, որ համակարգի յուրաքանչյուր դիվիզիոնը բաղկացած է 8 արձակման կայանից, իսկ 2 դիվիզիոնն արդեն համարվում է գունդ)։

Այն ժամանակ դեռևս նշվում էր, որ նպատակը Ռուսաստանի հետ համատեղ հակաօդային պաշտպանության համակարգի ստեղծումն է: Նույն նպատակով 2015-ի ապրիլին էլ Ռուսաստանը 4 միավոր նույն զենիթահրթիռային համակարգերից անվարձահատույց հանձնել է Բելառուսին: Նշվում էր, որ Բելառուսի հետ տարածաշրջանային ՀՕՊ համակարգի կայացումից հետո Ռուսաստանն անցնելու է Հայաստանի և Ղազախստանի հետ նմանատիպ համակարգերի ստեղծմանը։ Այս մասին դեռևս 2013-ի նոյեմբերին հայտնել էր նաև ՌԴ նախագահ Վլադիմիր Պուտինը։

Հետագայում՝ 2014-ի մայիսի 26-ին, Ղազախստանի նախագահ Նուրսուլթան Նազարբաևը ստորագրեց ՌԴ-ի հետ համատեղ տարածաշրջանային ՀՕՊ համակարգի ստեղծման համաձայնագրի վավերացման համար օրենքը:

Ենթադրվում է, որ տարածաշրջանային համակարգերի ստեղծումից հետո կմշակվի Անկախ պետությունների համագործակցության (ԱՊՀ) միացյալ ՀՕՊ համակարգի մարտական հերթապահության իրականացման ու տեղեկատվության փոխանակման կարգը։

Նշենք, որ ԱՊՀ միասնական ՀՕՊ համակարգը ստեղծվել է 1995-ի փետրվարին ԱՊՀ 9 պետությունների միջև կնքված պայմանագրով։ Ուկրաինան ու Ուզբեկստանը հետագայում սկսել են Ռուսաստանի հետ համագործակցել միայն երկկողմ հիմունքներով։ Իսկ ներկայումս համակարգի մաս են Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանն ու Թուրքմենստանը։