ՌԴ-ն նախատեսում է ՀՀ-ի հետ միացյալ ՀՕՊ համակարգ ստեղծել. Պուտին

Ռուսաստանը նախատեսում է ուժեղացնել Բելառուսի հետ Միացյալ հակաօդային պաշտպանության համակարգը, որից հետո անցնել Հայաստանի և Ղազախստանի հետ նմանատիպ համակարգերի ստեղծմանը։ Այս մասին հայտնել է ՌԴ նախագահ Վլադիմիր Պուտինը բարձրաստիճան սպաների ներկայացման արարողությանը։

Ռուսական Ս-300 զենիթահրթիռային համակարգեր

Ռուսական Ս-300 զենիթահրթիռային համակարգեր

Ըստ ՌԴ նախագահի՝ այդպիսի համագործակցությունը հնարավորություն է տալու եվրասիական տարածքում ամրապնդել խաղաղություն և կայունություն։ Նա նաև նշել է, որ ընթացիկ տարում բարեհաջող անցել է «Արևմուտք-2013» ռուս-բելառուսական մարտավարական զորավարժությունը։

«Բարելավելու ենք մեր ավանդական դաշնակիցների և գործընկերների հետ փոխգործակցությունը, առաջին հերթին ՀԱՊԿ, Շանհայի համագործակցության կազմակերպության և ԱՊՀ անդամ պետությունների հետ»,- հավելել է Պուտինը։

Հիշեցնենք, որ դեռ հոկտեմբերի 29-ին Ռուսաստանի և Բելառուսի պաշտպանության նախարարների հանդիպումից հետո ՌԴ պաշտպանության նախարար Սերգեյ Շոյգուն նշել էր, որ մտադիր են Բելառուսին փոխանցել 4 միավոր Ս-300 զենիթահրթիռային համալիրներ։

Ըստ ռուսական աղբյուրների՝ համալիրների տրամադրումը պետք է իրականացվի տարածաշրջանային Միացյալ հակաօդային պաշտպանության համակարգի ստեղծման ծրագրի շրջանակներում։

Հավելենք, որ Միացյալ ՀՕՊ համակարգի ստեղծման մասին պայմանավորվածությունը ՌԴ-ի ու Բելառուսի միջև հաստատվել է դեռևս 2009-ի փետրվարին։ Նախատեսված էր դրա հիման վրա ստեղծել ԱՊՀ Արևելաեվրոպական հատվածի միասնական ՀՕՊ համակարգ։ Արդեն 2012-ի վերջին նախատեսված էր ստեղծել այդ համակարգի էլեկտրոնային կառավարում, որը կիրականացվեր ավտոմատացված ռեժիմով։

Նախատեսված է տարածաշրջանային միասնական ՀՕՊ համակարգեր ստեղծել նաև Կովկասում ու Միջին Ասիայում։ Մասնավորապես 2013-ին նույնպիսի պայմանավորվածություն է ձեռք բերվել Ռուսաստանի ու Ղազախստանի միջև, որից հետո, ըստ Ղազախստանի պաշտպանության նախարարի, ՌԴ-ն անհատույց Ղազախստանին էր հանձնելու Ս-300 համակարգեր։

Ենթադրվում է, որ տարածաշրջանային համակարգերի ստեղծումից հետո կմշակվի ԱՊՀ միացյալ ՀՕՊ համակարգի մարտական հերթապահության իրականացման ու տեղեկատվության փոխանակման կարգը։

Նշենք, որ ԱՊՀ միասնական ՀՕՊ համակարգը ստեղծվել է 1995-ի փետրվարին ԱՊՀ 9 պետությունների միջև կնքված պայմանագրով։ Ուկրաինան ու Ուզբեկստանը հետագայում սկսել են Ռուսաստանի հետ համագործակցել միայն երկկողմ հիմունքներով։ Իսկ ներկայումս համակարգի մաս են Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանն ու Թուրքմենստանը։

One response to “ՌԴ-ն նախատեսում է ՀՀ-ի հետ միացյալ ՀՕՊ համակարգ ստեղծել. Պուտին

  1. Pingback: Բելառուսը Սու-30 կործանիչների գնման նախնական համաձայնության է եկել ՌԴ հետ | Ռազմ.info

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *