Շուրջ իննամսյա մարտերից հետո Իրաքի կառավարական ուժերին հաջողվել է ավարտին հասցնել «Իսլամական պետություն» ահաբեկչական խմբավորումից Մոսուլ քաղաքի և հարակից շրջանների ազատագրման գործողությունը: Այս մասին հայտնում է Reuters գործակալությունը:
Իրաքի վարչապետ Հայդար ալ-Աբադին երեկ՝ հուլիսի 9-ին, այցելել է ազատագրված քաղաք և զինված ուժերին շնորհավորել հաղթանակի կապակցությամբ: Քաղաքում բարձրացվել է Իրաքի դրոշը:
Iraqi News լրատվակայքը փոխանցում է, որ քաղաքի արևմուտքում ԻՊ վերահսկողության տակ է շարունակում մնալ «մի քանի մետր»՝ Տիգրիս գետի ափամերձ Քլեյաթ և Շահուան շրջաններում:
The Iraqi flag raised by #Iraq‘s Federal Police over a free #Mosul. The day millions of Iraqis were patiently waiting for. pic.twitter.com/xYmzP5dQrp
— Haidar Sumeri (@IraqiSecurity) July 9, 2017
Մոսուլը ահաբեկիչների ձեռքում էր 2014 թվականից, երբ ԻՊ զինյալներին հեշտությամբ հաջողվել էր Մոսուլից դուրս մղել կառավարական ուժերը և ոստիկանական զորքերը: 2014 թվականից քաղաքը լքել է շուրջ 900 հազար մարդ:
Հունիսի 29-ին Իրաքի կառավարական բանակը ազատագրել էր Մոսուլի Ան Նուրի Մեծ մզկիթը, որը Մոսուլում «Իսլամական պետության» ամենակարևոր և վերջին հենակետերից մեկն էր։ Մզկիթի գրավումից հետո Իրաքի պաշտպանության նախարարության ներկայացուցիչը հայտարարել էր, որ Մոսուլն ազատագրված է։ Մզկիթն ավելի վաղ պայթեցրել էին ԻՊ զինյալները: Իրաքի պաշտպանության նախարարը մզկիթի պայթեցումը ԻՊ կողմից պարտության ընդունում էր որակել։
Մզկիթի ազատագրումը խորհրդանշանական էր, քանի որ այստեղից էր 2014-ին ԻՊ պարագլուխ Աբու Բաքր ալ-Բաղդադին հայտարարել «Իսլամական խալիֆայության» ստեղծման մասին:
ԻՊ-ից Մոսուլ քաղաքի և հարակից տարածքների ազատագրման գործողությունը Իրաքի կառավարական ուժերը սկսել են 2016-ի հոկտեմբերի 17-ից։ Ազատագրման գործողության մեկնարկի մասին հայտարարել էր հենց Իրաքի վարչապետը:
Մոսուլի գործողությունների ընթացքում առաջին լուրջ առաջխաղացումը նոյեմբերի 1-ին էր՝ Մոսուլի ազատագրման գործողության 16-րդ օրը, երբ Իրաքի կառավարական զորքերը 2014-ից սկսած առաջին անգամ մուտք են գործել բուն քաղաք։
2017-ի հունվարին Իրաքի ուժերին հաջողվել է վերահսկողություն սահմանել Մոսուլ արևելյան հատվածում, ինչին հաջորդել էին արևմտյան հատվածի ազատագրման համար գործողությունները:
Գործողությանը մասնակցում էին Իրաքի կառավարական բանակի, քրդական Փեշմերգե զորաջոկատների մարտիկներ, ինչպես նաև կառավարամետ շիա զինյալներ: Սակայն բուն քաղաքում ընթացող մարտերը հիմնականում մղել են Իրաքի կառավարական բանակի մարտիկները:
Գործողության շրջանակներում ԱՄՆ գլխավորած միջազգային կոալիցիան ևս ավիահարվածներ է հասցրել քաղաքում ԻՊ դիրքերին։
«Իսլամական պետությունը» Իրաքի կառավարական բանակի դեմ օգտագործում էր ականանետներ, հրթիռահրետանային զինտեխնիկա, ինչպես նաև մեծ քանակությամբ ինքնաշեն պայթուցիկ սարքավորումներով բեռնված մեքենաներ։