Մարտի 20-ին Թուրքիայի նախագահ Ռեջեփ Թայիփ Էրդողանի գլխավորությամբ անցկացվել է Ազգային անվտանգության խորհրդի (ԱԱԽ) նիստ, որտեղ հիմնականում քննարկվել է Սիրիայում, մասնավորապես՝ Եփրատի և Մանբիջի արևելքում քրդական ուժերի դեմ գործողությունները։
ԱԱԽ նիստից հետո տարածված հայտարարությունը փոխանցում է Թուրքիայի պետական «Անադոլու» լրատվական գործակալությունը։ Հայտարարության մեջ նշվում է, որ Թուրքիան շարունակելու է իր գործողությունները «ահաբեկչական համարվող կազմակերպությունների, այդ թվում՝ Գյուլենականների, «Քրդստանի աշխատավորական կուսակցության», «ժողովրդական ինքնապաշտպանության ջոկատների», «Իսլամական պետության»» դեմ։
Թուրքիան, ըստ էության, կրկին սպառնացել է Սիրիայի հյուսիսում քրդական ուժերին՝ պնդելով, որ «առանց Մանբիջի և Եփրատի արևելքում տեղակայված ահաբեկչական միավորների մաքրման հնարավոր չէ տարածաշրջանում խաղաղություն հաստատել»։
Հիշեցնենք, որ 2018թ․ դեկտեմբերի 12-ին Էրդողանը հայտարարեց, որ Թուրքիան շուտով նոր ռազմական գործողություն է սկսելու Սիրիայում քրդական «Ժողովրդական ինքնապաշտպանության ջոկատների» (YPG) խմբավորման դեմ Եփրատի արևելքում։ Մինչ այսօր թուրք մի շարք պաշտոնյաներ պարբերաբար հայտարարում են, որ նոր գործողություն սկսելու համար գրեթե ամեն բան պատրաստ է, և այն շուտով սկսվելու է, սակայն այսօրվա դրությամբ նման գործողության մասին առնվազն հայտնի չէ։
Մանբիջում քրդական ուժերին աջակցում էր ԱՄՆ-ն, այստեղ թուրքական և ամերիկյան զինված ուժերը անցկացնում էին անկախ պարեկային գործողություններին։ Սակայն Էրդողանի հայտարարությունից ուղիղ մեկ շաբաթ անց՝ դեկտեմբերի 19-ին, ԱՄՆ նախագահ Դոնալդ Թրամփը հայտարարեց Սիրիայից իր զորքերը դուրս բերելու մասին։ Այս իրավիճակում քրդերը մեղադրեցին ԱՄՆ-ին իրենց թուրքական սպառնալիքի առաջ միայնակ թողնելու համար։
Դեկտեմբերի 24-ին թուրքերը Ալ-Բաբ նահանգից շարասյունով շարժվեցին դեպի Մանբիջ, սակայն հաջորդ օրը Սիրիայի կառավարական ուժերը զորքերը դուրս բերեցին Առիմա թաղամաս, որը Մանբիջի ու Ալ-Բաբի մեջտեղում է, այսպիսով փակելով թուրքերի ճանապարհը դեպի Մանբիջ։