ԱՄՆ աջակցությամբ գործող, գլխավորապես քրդերից կազմված «Սիրիայի դեմոկրատական ուժեր» (SDF) խմբավորումը «Եփրատի ցասում» գործողության շրջանակներում ամբողջովին ազատագրել է Սիրայի Տաբկա քաղաքը և վերահսկողություն հաստատել Սիրիայի ամենամեծ ջրամբարի նկատմամբ։
Այս մասին մայիսի 10-ին տեղեկացնում է Reuters լրատվական գործակալությունը։
Confirmed: #ISIS defeated in #Tabqa Dam and Tabqa City, now in hands of Syrian Democratic Forces, led by its Syrian Arab Coalition. #SDF
— Brett McGurk (@brett_mcgurk) May 10, 2017
Այժմ քրդական ուժերը և ԱՄՆ գլխավորած կոալիցիայի հատուկջոկատայինները առաջանում են դեպի ԻՊ գլխավոր հենակետ հանդիսացող Ռաքքա քաղաք։
Ավելի վաղ SDF-ից հայտնել էին, որ խմբավորումը «Եփրատի ցասում» գործողության շրջանակում ԻՊ-ից գրավել է Սիրիայի Տաբկա քաղաքի շուրջ 90 տոկոսը:
Տաբկա քաղաքը մոտ 50 կմ հեռավարության վրա է Ռաքքա քաղաքից, որը ներկայում ԻՊ կենտրոնն է: Նաև այստեղ է գտնվում Սիրիայի ամենամեծ ջրամբարը: Սրանցով էլ պայմանավորված է քաղաքի ռազմավարական նշանակությունը:
Քրդական ուժերը դեռ մարտին վերահսկողություն էին հաստատել Տաբկայի ջրամբարի մի հատվածի վրա:
Հիշեցնենք, որ 2016-ի նոյեմբերի 5-ին «Սիրիայի դեմոկրատական ուժեր» (SDF) խմբավորումը հայտարարել է ԻՊ «մայրաքաղաք» Ռաքքան և հարակից տարածքները ազատագրելու «Եփրատի ցասում» գործողության մեկնարկի մասին։
Նշենք, որ SDF խմբավորման կազմի մեջ մտնում են զորաջոկատներ Սիրիայի քրդական «Ժողովրդական ինքնապաշտպանության ջոկատներից» (YPG), «Քրդական դեմոկրատական միության» (PYD) ուժերից և արաբական զինյալ, ընդդիմադիր տարբեր խմբավորումներից:
Միացյալ Նահանգները աջակցում է Սիրիայի քրդական ուժերին՝ նրանց դիտարկելով որպես ԻՊ դեմ պայքարող հիմնական ուժերից մեկը: 2017-ին ԱՄՆ-ն քրդերին երկու անգամ որպես օգնություն տրամադրել է տարբեր տեսակի սպառազինություն, այդ թվում՝ զրահափոխադրիչներ (1, 2):
Իսկ ավելի վաղ ԱՄՆ-ն 48 նոր զրահապատ մեքենաներ և 250 զինծառայող էր ուղարկել Սիրիայի քրդական «Ժողովրդավարական միություն կուսակցության» վերահսկողության տակ գտնվող Ալ-Հասաքա նահանգ։
Տաբկայում գտնվող Սիրիայի ամենամեծ ջրամբարը