Օգոստոսի 13-ին Ռուսաստանի Պսկովի և Լենինգրադյան շրջանների 3 հատուկ մասնագիտացված զորավարժարաններում կմեկնարկի ՀԱՊԿ օպերատիվ արձագանքման հավաքական ուժերի «Փոխգործակցություն-2016» զորավարժությունը, որին ներգրավված են 6000 զինծառայող և 1000 տեխնիկա: Այս մասին այսօր՝ օգոստոսի 9-ին հայտնում է ՌԴ ՊՆ մամուլի ծառայությունը:
ՀԱՊԿ օպերատիվ արձագանքման հավաքական ուժերի դեսանտավորում «Փոխգործակցություն-2015» զորավարժության ակտիվ փուլում
Զորավարժությանը ներգրավված են Հայաստանի, Բելառուսի, Ղազախստանի, Ղրղզստանի, Ռուսաստանի և Տաջիկստանի Զու ստորաբաժանումներ: ՌԴ ԶՈւ կազմից վարժանքներին մասնակցելու են Արևմտյան ռազմական շրջանի, օդադեսանտային ուժերի ստորաբաժանումները, զորամասերը: Վարժանքները կավարտվեն օգոստոսի 19-ին:
Հրամանատարաշտաբային զորավարժությունն անցկացվելու է երկու փուլով, որոնց ընթացքում ստուգվելու են տարբեր ստորաբաժանումների միջև փոխգործակցության մակարդակը, ինչպես նաև գործողությունները ՀԱՊԿ անդամ երկրներից մեկի տարածքում հակամարտության սրման դեպքում:
Ներգրավված ստորաբաժանումները պետք է փորձեն համալիր կրակային ազդեցության միջոցով արգելափակել պայմանական հակառակորդի գործողությունները: Վարժանքների բոլոր փուլերով օգտագործվելու են ռազմական ավիացիան, հրթիռահրետանային զորքերը:
ՀԱՊԿ օպերատիվ արձագանքման հավաքական ուժերի «Փոխգործակցություն» զորավարժություններն ամենամյա են: 2015-ին զորավարժությունն անցկացվել է Ռուսատսանում, 2014-ին՝ Ղազախստանում, 2013-ին՝ Բելառուսում, 2012-ին՝ Հայաստանում:
Նշենք, որ 2016-ի հոկտեմբերին Ռուսաստանը և ՀԱՊԿ անդամ կենտրոնասիական պետությունները անցկացնելու են «Ռուբեժ-2016» զորավարժությունը, որին Հայաստանը չի մասնակցելու: