Մինսկի համաձայնությամբ փետրվարի 15-ին Ուկրաինայի արևելքում կհաստատվի հրադադար

Միսկում Ուկրաինայի ճգնաժամի հաղթահարման ուղիների որոնման վերաբերյալ բանակցություններում համաձայնություն է ձեռք բերվել, ըստ որի՝ փետրվարի 15-ին ժամը 00:00-ից հայտարարվելու է հրադադար: Այս մասին, ըստ ռուսաստանյան «ՏԱՍՍ» գործակալության, լրագրողներին տեղեկացրել է ՌԴ նախագահ Վլադիմիր Պուտինը:

Ուկրաինական ճգնաժամի վերաբերյալ «նորմանդական քառյակի» բանակցությունները Մինսկում. 11-12 փետրվարի, 2015

Փետրվարի 11-12-ը տևած բանակցություններին մասնակցել են Ֆրասնիայի նախագահ Ֆրանսուա Օլանդը, Գերմանիայի կանցլեր Անգելա Մերկելը, Ռուսաստանի և Ուկրաինայի նախագահներ Վլադիմիրի Պուտինն ու Պյոտր Պորոշենկոն։  Ձեռքբերված համաձայնությամբ հրադադարի հաստատումից հետո հակամարտող կողմերը՝ Ուկրաինայի կենտրոնական իշխանությունն ու ապստամբական ուժերը, զորքերի շփման գծից հետ են քաշելու խոշոր սպառազինությունը:

Քառյակի առաջարկած պայմաններն ընդունել են նաև Ուկրաինայի արևելքում ինքնահռչակված Դոնեցկի ու Լուգանսկի հանրապետութունների ղեկավարները:

Կողմերը որոշակի համաձայնության են եկել նաև ճգնաժամի հետագա ճակատագրի վերաբերյալ: Այստեղ կա մի քանի տարբերակ, որոնցից մեկի համաձայն, ըստ Պուտինի, Ուկրաինայում սահմանադրական բարեփոխումներ են արվելու ու հաշվի են առնվելու երկրի արևելքում բնակվողների ցանկությունները:

Համաձայնության հասնելու մասին լուրը հաստատել է նաև Ֆրանսիայի նախագահ Ֆրանսուա Օլանդը՝ ավելացնելով, որ համաձայնության հաստատումից հետո դեռ պետք է հասնել դրա պայմանների կատարմանը:

Նշենք, որ Մինսկում «նորմանդական քառյակի» հանդիպումը տևել է մոտ 16 ժամ ու ավարտվել է այսօր՝ փետրվարի 12-ին՝ ժամը 13-ի սահմաններում։ Սրա նպատակն ուկրաինական ճգնաժամի լուծման ուղիների համաձայնեցումն էր։ Քառյակի հանդիպման ամբողջ ընթացքը եղել է փակ:

Ավելացնենք, որ Ռուսաստանի, Ուկրաինայի, Գերմանիայի ու Ֆրանսիայի ղեկավարների, ինչպես նաև արտգործնախարարների բանակցություններին «նորմանդական քառյակի» հանդիպումներ ոչ պաշտոնական անվանումը տրվել է, երբ պաշտոնյաներն ուկրաինական ճգնաժամի հաղթահարման լուծումներ փնտրելու նպատակով առաջին անգամ հանդիպել են 2014-ի հունիսի 6-ին Ֆրանսիայում՝ Երկրորդ աշխարհամարտի առանցքային իրադարձություններից մեկի՝ Նորմանդիայում դաշնակից զորքերի ափհանման 70-ամյակի տոնակատարությունների ժամանակ: