Թուրքիան նախապատվությունը տվեց չինական ՀՕՊ համակարգերին

Թուրքիայում որոշել են նախապատվությունը տալ չինական արտադրության հեռահար զենիթահրթիռային կայաններին, թեև պայքարում էին նաև ամերիկյան, ռուսական և ֆրանս-իտալական ընկերությունները։

Սեպտեմբերի 26-ին Թուրքիայի վարչապետ Թայիփ Էրդողանի գլխավորությամբ և պաշտպանության նախարարի, գլխավոր շտաբի պետի և ռազմարդյունաբերական քարտուղարության ղեկավարի մասնակցությամբ ռազմարդյունաբերական հանձնաժողովի նիստի ժամանակ որոշվել է նախապատվությունը տալ Չինաստանի առաջարկած ՀՕՊ համակարգերին։

Թուրքիան պայմանագիր է կնքելու չինական CPMIEC ընկերության հետ, որի հետ համատեղ երկրի տարածքում արտադրվելու են զենիթահրթիռային կայանները։
Այսպիսով, Թուրքիան որոշեց ընտրել չինական ընկերությանը, քանի որ հնարավորություն կստանա օգտագործել նրա տեխնոլոգիաները և ՀՕՊ համակարգերի սեփական արտադրություն հիմնել երկրի տարածքում։
Բացի այդ, չինական տարբերակները մրցույթի մյուս մասնակիցներից ավելի մատչելի գին ունեին։

Նշենք, որ Թուրքիայում դիտարկում էին նաև ամերիկյան «Փեթրիոթ» (Patriot PAC3), ռուսական Ս-300 կամ Ս-400, ֆրանս-իտալական Սամպ Տ (Samp T) ՀՕՊ համակարգերի թեկնածությունը։

CPMIEC ընկերությունը զբաղվում է HQ-9 միջին և հեռահար զենիթահրթիռային կայանների արտադրությամբ։ HQ-9-ի արտահանվող տաբերակն է FD-2000-ը, որին էլ նախապատվություն են տվել թուրքերը։