Դեկտեմբերի 8-ին Թուրքիայի պաշտպանության նախարար Ֆիքրի Ըշըքը հետևել է տեղական արտադրության միջին հեռահարության «ՀԻՍԱՐ-Օ» հակաօդային պաշտպանության համակարգի փորձարկումների վերջին փուլին: Այս մասին հայտնում է Թուրքիայի ՊՆ կայքը:
Փորձարկումներն իրականացվել են Թուրքիայի կենտրոնական Աքսարայ նահանգի տարածքում։ Նշվում է, որ փորձարկումն անցել է հաջողությամբ: Այն նախատեսվում է հանձնել Թուրքիայի ռազմաօդային ուժերի սպառազինությանը, սակայն ժամկետներ դեռ չեն նշվում:
Հրթիռերը նախ առաջին իմպուլսային շարժիչի միջոցով բաց են թողնվել արձակման կայանից, ապա երկրորդ իմպուլսային շարժիչի միջոցով շարժվել թիրախի ուղղությամբ:
ՀՕՊ համակարգի արձակման կայանը և հրթիռներն արտադրում է թուրքական «Ռոքեթսան» ռազմարդյունաբերական ընկերությունը, իսկ ռադարային և ղեկավարման համակարգերը՝ «Ասելսանը»: «ՀԻՍԱՐ-Օ» հրթիռի խոցման առավելագույն հեռահարությունը մինչև 25 կմ է:
Հավելենք, որ զենիթահրթիռային սեփական համակարգի մշակումը Թուրքիան սկսել է 2011 թվականին Թուրքիայի ռազմարդյունաբերական քարտուղարության ղեկավարած «Ցածր հեռահարության հակաօդային պաշտպանության հրթիռային համակարգ» (HISAR-A) նախագծի շրջանակներում։ «ՀԻՍԱՐ-Ա»-ի հրթիռների առավելագույն հեռահարությունը 10-15 կմ է։ Համակարգը նախատեսվում է շահագործման հանձնել 2018 թվականին։
Ավելացնենք, որ Թուրքիան ցանկանում է ձեռք բերել առավել մեծ հեռահարության ՀՕՊ համակարգեր, սակայն 2013 թ. մինչ օրս հայտարարված մրցույթը քանիցս հետաձգվել է: Տեղում թուրքական ընկերություններն առայժմ արտադրում և փորձարկում են ցածր հեռահարության համակարգեր: Ռազմ.ինֆոյում կարող եք կարդալ նաև այս գործընթացի նախապատմության ու զարգացումների մասին։
Pingback: Ռազմաշաբաթ. Տարածաշրջան. 4 դեկտեմբեր – 10 դեկտեմբերի, 2016 | Ռազմ.info