2020 թվականի հունվարի 1-ից մինչև պատերազմի նախորդ օրը՝ սեպտեմբերի 26-ը ներառյալ, Razm.info-ն արձանագրել է հայկական զինված ուժերի (ներառյալ Արցախի Պաշտպանության բանակի) 54 զինծառայողի մահ՝ օգտվելով բաց աղբյուրներից և ՀՀ գլխավոր դատախազության տրամադրած տվյալներից։
Նշենք, որ պետական կառույցները բանակում մահվան դեպքերը տարբերակում են որպես «ծառայության հետ կապված» և «ծառայության հետ չկապված»։ Վերջինների դեպքում պաշտպանական գերատեսչությունները հաղորդագրություն չեն տարածում, սակայն մենք արձանագրում ենք նաև այդ մահվան դեպքերը։
Նշված ժամանակահատվածում հակառակորդի գործողություններից զոհվել է 8 զինծառայող, որոնցից մեկը մարտին, վեցը՝ Տավուշում հուլիսյան բախումների ընթացքում, ևս մեկը՝ սեպտեմբերին։ 1 զինծառայող էլ մայիսին է մահացել, ականի պայթյունի հետևանքով։ Այսպիսով՝ մինչ պատերազմը մարտական կորուստները 9-ն են, ոչ մարտականները՝ 45-ը։
Ռազմինֆոն մարտական է համարում հակառակորդի գործողությունների, ինչպես նաև առաջնագծում ականների պայթյունների հետևանքով կորուստները։ Ոչ մարտական ենք հաշվում սպանությունների, ինքնասպանությունների, դժբախտ պատահարների (ավտովթարներ, զենքի, զինամթերքի հետ վարվելու կանոնների խախտումներ և այլն) պատճառով կորուստները։
| Մարտական | Ոչ մարտական | |
| Հունվար | 0 | 6 |
| Փետրվար | 0 | 7 |
| Մարտ | 1 | 2 |
| Ապրիլ | 0 | 2 |
| Մայիս | 1 | 4 |
| Հունիս | 0 | 8 |
| Հուլիս | 6 | 1 |
| Օգոստոս | 0 | 11 |
| Սեպտեմբեր | 1 | 4 |
| Ընդհանուր | 9 | 45 |
Մահացածներից 14-ը ժամկետային զինծառայող է, 40-ը՝ պայմանագրային զինծառայող և սպա։
45 ոչ մարտական պայմաններում մահվան պատճառները եղել են ինքնասպանությունը (9 դեպք), ավտովթարները (10), հիվանդությունները (16*), սպանությունները (2), դժբախտ պատահարները (8)։
*Մահացած զինծառայողներից երկուսը վարակված են եղել կորոնավիրուս հիվանդությամբ։
Նշենք, որ Ռազմինֆոն սկսել է հայկական բանակի կորուստների վիճակագրություն կազմել 2013 թվականից։ Գիտակցելով, որ պատերազմը փոխում է ողջ պատկերը, այս տարի որոշեցինք՝ 2020–ի կորուստների տարեկան ամփոփումը երեք փուլով ներկայացնել՝ առանձին արձանագրելով թե՛ մինչպատերազմյան, թե՛ պատերազմյան և թե՛ հետպատերազմյան զոհերը։
| Տարի | Մարտական | Ոչ մարտական | Ընդհանուր |
| 2013 | 6 | 24 | 30 |
| 2014 | 30 | 16 | 46 |
| 2015 | 41 | 35 | 76 |
| 2016 | 109 | 58 | 167 |
| 2017 | 26 | 50 | 76 |
| 2018 | 9 | 54 | 63 |
| 2019 | 4 | 45 | 49 |
| 2020․ մինչ պատերազմ | 9 | 45 | 54 |
Այսպիսով՝ փորձելու ենք գրանցել և հրապարակել նաև 2020 թվականի սեպտեմբերի 27-ից նոյեմբերի 10-ը տևած ռազմական գործողությունների ընթացքում, ինչպես նաև հետպատերազմյան շրջանում գրանցված բոլոր կորուստները։