Ապրիլի 9-ին Իրանի ռազմածովային ուժերի «Նաղդի» ականակիր նավը և «Թոնբ» թիկունքային ապահովման նավը 3-օրյա պաշտոնական այցով ժամանել են Պակիստան այդ երկրի ռազմածովային ուժերի հետ համատեղ ծովային վարժանքներ անելու համար: Այս մասին հայտնում է իրանական «Թասնիմ» գործակալությունը:
Իրանի ՌԾՈւ նավերը խարիսխ են գցել Պակիստանի Կարաչի նավահանգստում, նրանց դիմավորել են Պակիստանի ՌԾՈւ բարձրաստիճան զինվորականներ: Իրանի ՌԾՈւ նավերը պլանավորում են վերադառնալ Իրան ապրիլի 11-ին:
Այցի նպատակն է ամրապնդել և ընդլայնել Իրանի և Պակիստանի միջև հարաբերություններն ու համագործակցությունը:
Ավելի վաղ՝ մարտի 12-ին, պակիստանյան նավախումբը՝ կազմված «Թիփփու սուլթան» ականակիր նավից և «Ջուրրաթ» հրթիռային նավից, եռօրյա բարեկամական այցով Իրան է ժամանել և Օմանի ծովում համատեղ զորավարժություն է անցկացրել Իրանի ռազմածովային ուժերի հետ:
Նմանատիպ այցով Պակիստանի ՌԾՈւ նավերը Իրան են ժամանել նաև 2014 և 2016 թվականներին։
Ավելի վաղ՝ 2016-ի սեպտեմբերին, Իրանը նույնպես նավախումբ էր ուղարկել Պակիստան։ Այցի ընթացքում երկրները Պակիստանի Կարաչի նավահանգստում անցկացրել են համատեղ զորավարժություն: Իրանը նաև մասնակցել է 2017-ի փետրվարին Պակիստանում անցկացվող «Աման-17» զորավարժությանը։