Մարտի 16-ին Թուրքիայի պաշտոնական տեղեկատուն հրապարակել է 2016-ի պետբյուջեի օրենքը, որով ռազմական ոլորտին հատկացվում է շուրջ 37 մլրդ թուրքական լիրա (ներկայիս փոխարժեքով շուրջ 12,9 մլրդ ԱՄՆ դոլար): Սա շուրջ 6 մլրդ լիրայով ավելի է 2015-ի բյուջեով նախատեսված ռազմական ծախսերից: Նշենք, որ 2016թ. համար հաստատվել է ընդհանուր առմամբ շուրջ 570,5 մլրդ թուրքական լիրայի բյուջե:
Եթե հաշվի առնենք նաև ներքին գործերի նախարարությանը և ոստիկանությանը հատկացված գումարները, Թուրքիայի ողջ պաշտպանական բյուջեն կազմում է շուրջ 63 մլրդ լիրա (~22 մլրդ ԱՄՆ դոլար), և 2015-ի համեմատ ավելացել է շուրջ 10 մլրդ լիրայով:
Պաշտպանության նախարարության, այդ թվում նաև ԶՈւ գլխավոր շտաբի, ցամաքային, ռազմածովային և ռազմաօդային ուժերի հատկացումները կազմում են շուրջ 26 մլրդ 451 մլն թուրքական լիրա (~9 մլրդ 222մլն դոլար): Այդ թվում պաշտպանական ծախսերի համար առանձնացվել է շուրջ 26 մլրդ 107 մլն լիրա, որից անձնակազմի ծախսերին հատկացվել է շուրջ 13,5 մլրդ լիրա: 2015-ի համեմատ զինված ուժերի հատկացումներն ավելացել են շուրջ 5 մլրդ լիրայով:
Ժանդարմերիային, որը պատերազմի կամ պատերազմական իրադրության պայմաններում անցնում է ԶՈւ ԳՇ ենթակայության տակ, հատկացվել է շուրջ 8 մլրդ 276 մլն լիրա (~2 մլրդ 887 մլն դոլար), իսկ առափնյա անվտանգության հրամանատարությանը` շուրջ 577 մլն լիրա (~201 մլն դոլար):
Ազգային հետախուզական կազմակերպությանը հատկացվել է շուրջ 1 մլրդ 636 մլն թուրքական լիրա (~570 մլն դոլար): Այն 2015-ին հաստատված հատկացումներից շուրջ 500 մլն լիրայով ավելի է:
Թուրքիայի զինված ուժերի և ուժային այլ կառույցների ռազմական կարիքների բավարարմամբ, ռազմարդյունաբերական ընկերությունների հետ սպառազինության ձեռքբերման պայմանագրերի ստորագրումով և նմանատիպ այլ հարցերով զբաղվող, ինչպես նաև թուրքական պետական ռազմարդյունաբերական ընկերությունների հիմնական մասի խոշոր բաժնետեր հանդիսացող պաշտպանական անվտանգության գլխավոր վարչությանը (ՊԱԳՎ) հատկացվել է շուրջ 57 մլն լիրա (~20 մլն դոլար):
Սակայն, պետք է նշել, որ ամեն տարի թուրքական ռազմարդյունաբերության աջակցման համար հիմնադրամ է ձևավորվում, որտեղ հավաքվում է մինչև 1 մլրդ ամերիկյան դոլար։
Ներքին գործերի նախարարությանը հատկացվել է շուրջ 4,8 մլրդ լիրա (~1 մլրդ 673 մլն դոլար), իսկ ՆԳՆ-ի ենթակայության տակ գործող անվտանգության գլխավոր տնօրինությանը (ոստիկանություն)` շուրջ 21 մլրդ 140 մլն լիրա (~7 մլրդ 370 մլն դոլար): 2015-ին այն կազմում էր շուրջ 17 մլրդ 623 մլն լիրա:
Ազգային անվտանգության խորհրդին (ԱԱԽ) հատկացված գումարը կազմում է շուրջ 25 մլն 702 հազար լիրա (~9 մլն դոլար):
2015թ. (լիրա) | 2016թ. (լիրա) | |
ՊՆ, ԶՈւ ԳՇ | 22 764 255 000 | 26 451 504 000 |
Ժանդարմերիա | 6 489 530 000 | 8 276 881 000 |
Առափն. անվտ. | 506 226 000 | 576 812 000 |
ՊԱԳՎ | 46 643 000 | 57 377 000 |
ԱՀԿ | 1 108 220 000 | 1 636 803 000 |
Ընդհանուր ռազմ. | 30 914 874 000 | 36 999 377 000 |
ՆԳՆ | 3 898 467 000 | 4 794 246 000 |
Ոստիկանություն | 17 623 719 000 | 21 140 638 000 |
ԱԱԽ | 22 575 000 | 25 702 000 |
Ընդհանուր | 52 459 635 000 | 62 959 963 000 |
Նշենք, որ ներկայումս թուրքական ժանդարմերիան, ոստիկանությունը և ԶՈւ ԳՇ ստորաբաժանումները ակտիվորեն ներգրավված են Թուրքիայի արևելյան և հարավարևելյան շրջաններում քրդերի դեմ ռազմական գործողություններին: Իսկ մինչև 2017թ. վերջը Թուրքիան նախատեսում է կրկնապատկել ժանդարմերիայի և ոստիկանության հատուկ նշանակության ուժերի թվաքանակը` հասցնելով 40 հազարի:
Թուրքիայի արևելքում 2015-ի հուլիսին սկսած զինված բախումների ընթացքին կարող եք ծանոթանալ այս հղումով:
Pingback: Թուրքիայի պաշտպանական բյուջեն աճել է տեղական արժույթով (աղյուսակ) | Ռազմ.info