Հայտնաբերվել է ԻՊ-ի՝ Սիրիայից Թուրքիա տանող գետնուղի

Քրդական «Ժողովրդական ինքապաշտպանության ջոկատի» (YPG) մարտիկները «Իսլամական պետության» խմբավորումից Սիրիայի Թել Աբյադ գավառը գրավելուց հետո հայտնաբերել է Սիրիայից Թուրքիա տանող 500 մետրոնց գետնուղի։ Այս մասին հայտնում է թուրքական «Էնսոնհաբեր» լրատվակայքը։

Սիրիայի Թել Աբյադ քաղաքից դեպի Թուրքիա փորված գետնուղու մուտքը

Ըստ լրատվակայքի փոխանցած տեղեկությունների՝ Սիրիայի մեծամասամբ քրդաբնակ Ռոժովա շրջանի Թել Աբյադ քաղաքի մոտակայքից դեպի Թուրքիայի Աքչաքալե գավառ տանող 3 մետր խորությամբ 500-մետրանոց թունելի բարձրությունը եղել է մոտավորապես 1,5 մ, իսկ լայնությունը՝ 1 մ։

Թել Աբյադը Սիրիան Թուրքիային կապող կարևորագույն կետերից մեկն է, որտեղ կա խոշոր սահմանային անցակետ։ 2014 թվականից այն գտնվում էր «Իսլամակն պետություն» ահաբեկչական խմբավորման հսկողության ներքո։ Հաշվի առնելով Թուրքիայի՝ ԻՊ-ի հետ կապերը և վերջինիս տրամադրվող օգնությունը փաստող տեղեկությունները՝ ըստ ամենայնի այդ թունելը ևս ծառայել է խմբավորման գրոհայինների Թուրքիա անարգել մուտք գործելու և սպառազինություն ներկրելու համար։ Սակայն լրատվամիջոցը նաև նշում է, որ գետնուղու մի մասը քանդված է եղել, և այն չի գործել։

Տեղին է նշել, որ ամերիկյան New York Times պարբերականի մայիսի 4-ի հրապարակման մեջ նշվում էր, որ Թուրքիայի տարածքում՝ մասնավորապես նույն Աքչաքալե գավառում վերամշակվում և «Իսլամական պետություն» ահաբեկչական խմբավորմանը մատակարարվում է զինամթերք` այդ թվում ամոնիումի նիտրատ, որն օգտագործվում է պայթուցիկներ պատրաստելու համար:

Հավելենք, որ 2015-ի մայիսի 28-ին թուրքական «Ջումհյուրիեթ» պարբերականի կայքը հրապարակել էր տեսանյութ, որում հստակ երևում էր, որ 2014-ին հունվարին Թուրքիայի ազգային անվտանգության կազմակերպության ուղեկցությամբ Սիրիա գնացող բեռնատարները զենք են տեղափոխել:

Հիշեցնենք նաև, որ քրդական PYG-ի և «Սիրիայի ազատ բանակ» խմբավորման մարտիկներին հունիսի 16-ին վերջնականապես հաջողվել էր «Իսլամական պետություն» ահաբեկչական խմբավորման տիրապետությունից ազատագրել Թուրքիայի սահմանակից Թել Աբյադ քաղաքը և անցակետը։