ՀՀ նախագահը Իտալիայի ՊՆ-ում քննարկել է երկկողմ ռազմական գործակցությունը և Արցախի հիմնահարցը

Պաշտոնական այցով Իտալիայում գտնվող ՀՀ նախագահ Սերժ Սարգսյանն այսօր՝ ապրիլի 9-ին, հանդիպել է Իտալիայի  պաշտպանության նախարար Ռոբերտա Պինոտիին: Զրուցակիցները քննարկել են երկու երկրների ռազմական ոլորտի երկկողմ համագործակցության ընդլայնմանը վերաբերող հարցեր: Այս մասին տեղեկացնում է ՀՀ նախագահի կայքը:

Իտալիայի պաշտպանության նախարար Ռոբերտա Պինոտին ընդունել է ՀՀ նախագահի գլխավորած պատվիրակությանը

Հայաստանի նախագահը և Իտալիայի պաշտպանության նախարարը կարևորել են փաստը, որ ռազմական ոլորտում հայ-իտալական համագործակցությունը չի սահմանափակվում երկկողմ ձևաչափով և ընդգրկում է նաև խաղաղապահության ոլորտը. առաջին միջազգային առաքելությունը, որին միացել է Հայաստանը դեռևս 2004թ., ՆԱՏՕ-ի խաղաղապահ առաքելությունն է Կոսովոյում, որին հաջորդեցին Աֆղանստանի և Իրաքի առաքելությունները:

Սերժ Սարգսյանը նշել է, որ անցյալ տարվա նոյեմբերից նաև տիկին Պինոտիի անմիջական ջանքերի շնորհիվ, 32 հայ խաղաղապահ ծառայություն են իրականացնում Լիբանանում ՄԱԿ-ի խաղաղապահ ուժերի իտալական հրամանատարության ներքո (Շամա զինավանի անվտանգության ապահովում)։

Հայ-իտալական ռազմական գործակցության օրակարգում կարևորելով նաև կրթության բնագավառը՝ նախագահ Սարգսյանը բարձր է գնահատել նաև Իտալիայի ֆինանսավորմամբ հայ զինծառայողների բարձր որակի կրթություն են ստանալն Իտալիայում: Նախագահը որպես համագործակցության հաջողված օրինակ է բերել Իտալիայի ռազմական ակադեմիայի շրջանավարտ Արտաշես Դանիելյանին, ով Լիբանանում ՀՀ ԶՈւ խաղաղապահ զորախմբի հրամանատարն է:

Հայաստանի պատվիրակության անդամները Իտալիայի պաշտպանության նախարարությունից տեսակապով զրուցել են Լիբանանում իտալական զորախմբի կազմում ծառայություն անցնող հայաստանցի խաղաղապահների հետ

Կողմերը քննարկել են նաև Արցախյան հիմնահարցի և Հարավային Կովկասի տարածաշրջանում անվտանգությանն ու կայունությանը վերաբերող հարցեր:

Հանդիպումից հետո նախագահ Սերժ Սարգսյանը Իտալիայի պաշտպանության նախարար Ռոբերտա Պինոտիի հետ մասնակցել է պաշտպանության նախարարությունում կազմակերպված տեսակոնֆերանսին, որն անցկացվել է Լիբանանում ՄԱԿ-ի հովանու ներքո համատեղ խաղաղապահ գործողություն իրականացնող հայ և իտալացի զինվորների հետ:

Ավելացնենք, որ ՀՀ ԶՈւ խաղաղապահները ՄԱԿ-ի ՅՈՒՆԻՖԻԼ առաքելության իտալական զորախմբի կազմում Լիբանանում ծառայություն են կրում 2014թ. նոյեմբերից: ՀՀ ԶՈւ զինծառայողների 30 հոգանոց դասակը և 2 շտաբային սպաները Լիբանանում հսկում են ՄԱԿ-ի զինավանի անվտանգությունը:

ՀՀ ԶՈւ խաղաղապահների առաջին խումբը Լիբանան է մեկնել 2014թ. նոյեմբերի 27-ին: Առաքելությանը Հայաստանի մասնակցությունը նպատակ ունի ավելացնել ՀՀ ԶՈւ խաղաղապահ ստորաբաժանումների փորձառությունը: