Հայ խաղաղապահների առաջին խումբը մեկնել է Լիբանան

Նոյեմբերի 26-ի երեկոյան Իտալիայի ռազմաօդային ուժերի ինքնաթիռով Լիբանան է մեկնել և արդեն տեղակայման վայր է ժամանել հայ խաղաղապահների 32 հոգանոց ստորաբաժանումը: Այս մասին հայտնում է ՀՀ ՊՆ կայքը:

ՀՀ ԶՈւ խաղաղապահ ստորաբաժանման՝ Լիբանան մեկնելու հանդիսավոր արարողությունը

Հայկական խաղաղապահ ստորաբաժանումն իտալական զորախմբի կազմում մասնակցելու է ՄԱԿ-ի հովանու ներքո իրականացվող «Լիբանանում Միացյալ Ազգերի Կազմակերպության ժամանակավոր ուժեր» (ՅՈՒՆԻՖԻԼ) առաքելությանը և իրականացնելու է ՄԱԿ-ի զինավանի անվտանգության ապահովում:

Հայկական խաղաղապահ ստորաբաժանման Լիբանան ճանապարհման արարողությանը մասնակցել են ՀՀ պաշտպանության նախարար Սեյրան Օհանյանն ու Հայաստանում Իտալիայի արտակարգ և լիազոր դեսպան Ջիովաննի Ռիչուլին:

Խաղաղապահներին ուղված իր խոսքում Սեյրան Օհանյանը նշել է, որ միջազգային առաքելության կազմում օտարերկրացի զինծառայողների հետ ծառայելիս հայ խաղաղապահները ոչ միայն կսովորեն նրանց փորձից, այլև իրենք էլ շատ լավ որակներ կունենան ցուցադրելու:

— Լիբանան գնալու համար կա ևս մեկ կարևոր պատճառ: Լիբանանը ոչ Կոսովո է, և ոչ էլ Աֆղանստան: Լիբանանը Հայաստանի արտաքին անվտանգության շահերի տիրույթում գտնվող Մերձավոր Արևելք է: Ուստի իմացեք, որ ՅՈՒՆԻՖԻԼ-ի կազմում ձեր ծառայությամբ նպաստում եք նաև Հայաստանի Հանրապետության արտաքին անվտանգության ապահովմանը, — ավելացրել է նախարարը:

Նշենք, որ Լիբանանում ՄԱԿ-ի ժամանակավոր ուժերը (UNIFIL – United Nations Interim Force in Lebanon) այդ երկրում գործում են 1978-ից:

Հայաստանի պաշտպանության նախարարությանն այս տարվանից սկսած խաղաղապահ առաքելության շրջանակներում ՀՀ զինծառայողների 30 հոգանոց դասակ ու 2 շտաբային սպա է ուղարկելու Լիբանան, որտեղ զինծառայողները Իտալիայի զինված ուժերի խաղաղապահ ստորաբաժանման կազմում կհսկեն ՄԱԿ-ի զինավանի անվտանգությունը: Իտալիայի ստորաբաժանման կազմում հայ զինծառայողների ծառայության մասին տեխնիկական համաձայնագիրը կնքել են երկու երկրների պաշտպանության նախարարները 2014-ի հունիսի 4-ին Բելգիայում:

Առաքելությանը Հայաստանի մասնակցությունը նպատակ ունի ավելացնել ՀՀ ԶՈւ խաղաղապահ ստորաբաժանումների փորձառությունը: Ներկայում Հայաստանի խաղաղապահ ստորաբաժանումները նմանատիպ առաքելությունների շրջանակներում ծառայություն են իրականացնում նաև Աֆղանստանում ու Կոսովոյում: