Վրաստանի ԶՈւ գլխավոր շտաբի պետն Աֆղանստանում է. վրացի խաղաղապահների պարգևատրում, հանդիպումներ ISAF-ի հրամանատարության հետ։ Վրացի խաղաղապահների վերադարձ հայրենիք։ Երկրորդ բրիգադում իրականացված նորոգման աշխատանքների ավարտ։ Առողջարարական կենտրոնի բացում։ Թուրքիայի բարձրաստիճան զինվորականների ժամանումը Վրաստան։ Վարչապետի հանդիպում ԶՈւ հրամանատարության հետ։
” Վրաստանի զինված ուժերի գլխավոր շտաբի պետը Սուրբ Ծնունդը դիմավորել է Աֆղանստանի Հիլմենդ գավառում ծառայող վրաստանցի զինծառայողների հետ։ ԶՈւ գլխավոր շտաբի պետին ուղեկցում էին պաշտպանության նախարարի տեղակալը, ԳՇ պետի տեղակալը և առաջին բրիգադի հրամանատարը։ Բարձրաստիճան զինվորականները մասնակցել են տոնական միջոցառմանը, որից հետո պարգևատրել են զինծառայողներին գերատեսչական մեդալներով։
”Աֆղանստան կատարած այցի ընթացքում Վրաստանի զինված ուժերի գլխավոր շտաբի պետը հանդիպել է ISAF առաքելության հրամանատարությանը։ Աֆղանստանի Հիլմենդ գավառում Վրաստանի ԶՈւ ԳՇ պետ գեներալ-մայոր Կապանաձեն հանդիպել է «հարավ-արևմուտք շրջանի հրամանատարության» հրամանատար գեներալ-մայոր Վոլտեր Միլլերին և «Բելավուդ» մարտավարական խմբավորման հրամանատար գնդապետ Դենիել Սալիվանին։
Վրաստանի ԳՇ պետի հանդիպումը ISAF-ի հրամանատարության հետ
”Հունվարի 8-ին Աֆղանստանից վերադարձել է 155 զինծառայողից կազմված բաթումյան առանձին թեթև հետևակային գումարտակը։ Վերադարձած զինծառայողներին դիմավորել են պաշտպանության նախարարի տեղակալն ու զինված ուժերի գլխավոր շտաբի պետի առաջին տեղակալը։
-Վրաստանի զինված ուժերի հետևակային երկրորդ բրիգադում իրականացված վերանորոգման աշխատանքներին ծանոթանալու նպատակով հունվարի 9-ին Սենակի ռազմաբազա է պաշտպանության նախարար Իրակլի Ալասանիան։ Հիմնովին վերանորոգվել է բազայի շտաբը և թվով 11 զորանոց։ Նորոգվել են նաև ջեռուցման և օդափոխության համակարգերը։
-Ցերովանիում՝ Վրաստանի նախագահի նախկին նստավայրի տարածքում, որը փոխանցվել է պաշտպանության նախարարությանը, բացվել է առողջարարական կենտրոն՝ զինծառայողների և նրանց ընտանիքների համար։ Հունվարի 9-ին նորաբաց առողջարան է այցելել պաշտպանության նախարար Ալասանիան, ով անձամբ է ծանոթացել համալիրի ենթակառուցվածքներին և կենցաղային պայմաններին։
-Վրաստանի ԶՈւ ԳՇ պետն Աֆղանստան կատարած այցի ընթացքում հանդիպել է իր աֆղան գործընկերոջ հետ։ Կողմերը քննարկել են անվտանգության ոլորտում երկկողմ համագործակցության հարցեր։ Մասնավորապես, քննարկվել է Աֆղանստանում առաքելության ավարտից հետո աֆղանական զինվորականների՝ Վրաստանի ռազմական ուսումնական հաստատություններում վերապատրաստման հարցը։
-Պաշտոնական այցով Վրաստան են ժամանել Թուրքիայի զինված ուժերի գլխավոր շտաբի ներկայացուցիչները։ Հունվարի 10-ին գեներալ-լեյտենանտ Աթիլա Գյունալի գլխավորությամբ ժամանած բարձրաստիճան 22 զինվորականներին ընդունել է պաշտպանության նախարար Իրակլի Ալասանիան։ Կողմերը քննարկել են երկկողմ համագործակցությանն առնչվող հարցեր։ Քննարկվող հարցերից է եղել նաև համագործակցությունը ռազմական արդյունաբերության ոլորտում։
Թուրքական պատվիրակությունը Վրաստանում
Նկարը՝ Վրաստանի ՊՆ կայքի
-Հունվարի 11-ին Վրաստանի վարչապետ Իրակլի Ղարիբաշվիլին հանդիպել է երկրի զինված ուժերի հրամանատարության հետ։ Հանդիպմանը ներկա էր պաշտպանության նախարարը, ԶՈւ գլխավոր շտաբի պետը, բարձրաստիճան այլ զինվորականներ։ Զինվորականները վարչապետ Ղարիբաշվիլիին են ներկայացրել վրացական բանակում իրավիճակն ու 2014–ին նախատեսվող ծրագրերը։