ՌԴ ԶՈւ Հարավային ռազմական շրջանի Հայաստանում, Հարավային Օսիայում, Աբխազիայում տեղակայված համապատասխանաբար 102–րդ, 4–րդ և 7–րդ ռազմաբազաների զինծառայողները մինչև սեպտեմբեր մասնակցելու են մոտ 100 մարտավարական վարժանքների։
Այս մասին հայտնում է ՌԴ ՊՆ հեռուստաալիքը՝ հավելելով, որ վարժանքներին մասնակցելու են նաև Ղրիմում տեղակայված ստորաբաժանումները։ Մարտավարական վարժանքները պլանային են և լինելու են վաշտերի կազմով։ Վարժանքները սկսելու են հուլիսի վերջից։
Նշենք, որ տարեսկզբին Ռուսաստանի ՊՆ–ն հայտարարել էր, որ Հայաստանում տեղակայված 102–րդ ռազմաբազայի տարեկան վարժանքների թիվը աճելու է 10%–ով և ամբողջ 2019–ի ընթացքում զինծառայողներն անցկացնելու են 600 մարտավարական պարապմունք։
Խոսելով 102–րդ ռազմաբազայի զորավարժությունների մասին՝ հարկ է նշել, որ ռազմաբազայի ավիացիոն ստորաբաժանման հրամանատարը Razm.info–ին հայտնել էր, որ սեպտեմբերին նախատեսված է անցկացնել միացյալ զորավարժություն ՀՀ ԶՈւ ստորաբաժանումների հետ։
Հիշեցնենք նաև, որ Ղրիմում տեղակայված ուժերը այժմ անցկացնում են 2400 զինծաայողի մասնակցությամբ օդադեսանտային զորավարժություն։