Հոկտեմբերի 30-ին Ադրբեջանի ֆինանսների նախարարությունը հրապարակել է 2019թ․ բյուջեի նախագիծը, որով ռազմական ոլորտի հատկացումները կազմում են շուրջ 3 մլրդ 38 մլն մանաթ (հոկտեմբերի 30-ի փոխարժեքով՝ շուրջ 1 մլրդ 787 մլն ԱՄՆ դոլարին համարժեք գումար):
Ռազմական ծախսերը 2018–ի համեմատ նախատեսվում է ավելացնել 4,6 տոկոսով (~ 132 մլն մանաթ):
Հարկ է նշել, որ 2018թ․ բյուջեն, որը հաստատվել էր 2017թ․ դեկտեմբերի 29-ին, ռազմական ոլորտի ծախսերի համար նախատեսում էր ~2,7 մլրդ մանաթ, որի համամետությամբ 2019թ․ բյուջեն պետք է ավելանար 11 տոկոսով։
Սակայն, 2018թ․ հուլիսին պաշտպանական ոլորտի հատկացումները ավելացան՝ կապված նավթի թանկացման հետ, հասնելով մինչև ~2,9 մլրդ մանաթի։ Այս դեպքում, 2019թ․ բյուջեն ավելանում է 4,6 տոկոսով։
Ադրբեջանի 2019 թ. պաշտպանական բյուջեն. նախագիծ
Մանաթ | Դոլլար | ||
8.2. | Պաշտպանություն | 3037618152 | 1786834207 |
8.2.1. | Պաշտպանության ուժեր | 1494074656 | 878867445 |
8.2.2. | Ազգային անվտանգություն | 156989306 | 92346651 |
8.2.3. | Կիրառական հետազոտություններ | 2800878 | 1647575 |
8.2.4. | Այլ | 1383753312 | 813972536 |
«Այլ» բաժնով 2017 թ. առաջին անգամ նման խոշոր գումար հատկացվեց, որի զգալի մասը, ինչպես այդ ժամանակ ենթադրել էինք, ուղղվում է զենքի գնումներին, ռազմարդյունաբերական ծախսերին:
Նշենք, որ 2018թ․ բյուջեի համեմատ աճել է պաշտպանական ուժերի ու ազգային անվտանգության հատկացումները, որոնք ուղղվելու են պաշտպանության նախարարությանը, պետական սահմանապահ ծառայությանը, պետական անվտանգության ծառայության և արտաքին հետախուզության ծառայությանը։ Մյուս բաժինների հատկացումները գրեթե չեն փոխվել։
Ընթացիկ տարվա ռազմական բյուջեի համեմատ 2019 թվականի համար նախատեսված բյուջեով ռազմական ոլորտի ծախսերն աճում են նաև դոլարային փոխարժեքով՝ 2018 թ. շուրջ 1 մլրդ 700 մլն դոլար, իսկ 2019-ի նախագծով՝ շուրջ 1 մլրդ 787 մլն ԱՄՆ դոլար:
Նշենք, որ բյուջեի նախագիծը դեռևս պետք է ընդունվի խորհրդարանում, իսկ հետո պետք է հաստատի Ադրբեջանի նախագահ Իլհամ Ալիևը։
Հավելենք, որ 2018թ․ բյուջեի 2,9 մլրդ մանաթից 1,388 մլրդ մանաթը (~805 մլն դոլար) հատկացվել էր «հատուկ պաշտպանական նշանակության նախագծերին և միջոցառումներին»: