Լոնդոնը Թեհրանի դեմ պատժամիջոցներ չի սահմանի՝ չնայած Վաշինգտոնի պահանջին։ Հայտարությունը արվել է ի պատասխան Մեծ Բրիտանիայում ԱՄՆ դեսպան Վուդ Ջոնսոնի Իրանի դեմ պատժամիջոցներին սատարելու կոչին։
Այս մասին ռուսաստանյան Известия լրատվակայքին հայտնել են՝ Մեծ Բրիտանիայի ԱԳՆ մամուլի ծառայությունից։
Հայտարարության մեջ նշվում է, որ Միացյալ Թագավորությունը կշարունակի պահպանել միջուկային համաձայնագրի պայմանները և կպաշտպանի Թեհրանի հետ համագործակցող ընկերություններին ԱՄՆ պատժամիջոցներից։
Օգոստոսի 7–ին ԱՄՆ նախագահ Դոնալդ Թրափը թվիթերյան իր էջում գրել էր․ «Նրանք, ովքեր կհամագործակցեն Իրանի հետ, չեն համագործակցի ԱՄՆ–ի հետ»։
Հիշեցնենք, որ մայիսի 8-ին ԱՄՆ նախագահ Դոնալդ Թրամփը հայտարարել էր, որ ԱՄՆ դուրս է գալիս Իրանի հետ կնքած Միջուկային համաձայնագրից և վերականգնում Իրանի նկատմամբ կիրառած տնտեսական պատժամիջոցները։
Միջուկային համաձայնագրից ԱՄՆ դուրս գալուց հետո Եվրամիությունը հայտարարել էր, որ հավատարիմ է մնալու Միջուկային համաձայնագրին: Իսկ Եվրամիության գերագույն հանձնակատար Ֆեդերիկա Մոգերինին և Ֆրանսիայի, Գերմանիայի ու Մեծ Բրիտանիայի ԱԳՆ–ները համատեղ հայտարարել էին, որ արգելափակում են ԱՄՆ պատժամիջոցները Եվրամիության տարածքում։
Օգոստոսի 6-ին վերջանում էր այն ժամկետը, որից հետո ԱՄՆ–ը պետք է վերականգեր Իրանի դեմ սահմանած պատժամիջոցների առաջին մասը: Թրամփն արդեն ստորագրել է պատժամիջոցների երկարացման հրամանագիրը։
Պատժամիջոցների 2-րդ մասը ավարտվում է նոյեմբերի 4-ին՝ ԱՄՆ միջուկային ծրագրից դուրս գալու 180-րդ օրը։ Այն վերաբերում է Իրանի նավթային, էներգետիկ և բանկային ոլորտներին։ Իրանին արգելվելու է նավթի արդյունահանումը, ինչը վնաս է ոչ միայն Իրանի, այլև գնորդ հանդիսացող եվրոպական երկների համար։ ԱՄՆ նախագահը խոստացել է շարունակել նաև այս պատժամիջոցները։
Ավելի վաղ՝ մայիսի 24-ին ԱՄՆ ֆինանսների նախարարությունը պատժամիջոցներ էր սահմանել իրանական 2 և թուրքական 4 ավիաընկերությունների նկատմամբ։ Ավիաընկերությունները մեղադրվում են իրանական Meraj Air և Mahan Air ավիաընկերություններին նյութատեխնիկական և ֆինանսական աջակցություն ցուցաբերելու մեջ։
Նանե Պետրոսյան