Իրանի բանակի ռազմածովային ուժերը մոտ ապագայում բարեկամական այցով նավեր կուղարկեն Իտալիա։ Իրանի ՌԾՈւ-ն «հետաքրքրված է նաև Իսպանիայի հետ կապերի հաստատմամբ»։ Այս մասին իրանական «Ֆարս» լրատվական գործակալության հետ հարցազրույցում հայտարարել է Իրանի բանակի ՌԾՈւ հրամանատար Հոսեյն Խանզադին։
Հիշեցնենք, որ 2016թ. սեպտեմբերին Իրան էր մեկնել Իտալիայի զինված ուժերի «Եվրո» ռազմանավը: Այցի ավարտին երկու երկրների ռազմածովային ուժերը համատեղ զորավարժություն էին անցկացրել։
Իրանի և Իտալիայի ռազմանավերի համատեղ զորավարժությունը
Հարցազրույցի ընթացքում Խանզադին հավելել է, որ Ատլանտյան օվկիանոս ուղևորվելիս իրանական նավերը կարող են կայանել Ալժիրում։
Ավելի վաղ Հոսեյն Խանզադին հայտարարել էր, որ Իրանը նավախումբ է ուղարկելու նաև Մեքսիկական ծոց։
Նշենք, որ իրանական նավերը Ատլանտյան օվկիանոս առաջին անգամ մուտք են գործել 2016-ի նոյեմբերին։ Իրանի ռազմածովային ուժերի 44-րդ նավախումբը՝ կազմված «Ալվանդ» ռազմանավից և «Բուշեհր» թիկունքային ապահովման նավից, Ատլանտյան օվկիանոս էր մուտք գործել Աֆրիկայի հարավով։