Իրանի ռազմածովային ուժերի 44-րդ նավատորմիղը` կազմված «Ալվանդ» ռազմանավից և «Բուշեհր» թիկունքային ապահովման նավից, Աֆրիկայի հարավով մուտք է գործել Ատլանտյան օվկիանոսի ջրեր: Այս մասին նոյեմբերի 21-ին մամուլի ասուլիսի ժամանակ հայտարարել է Իրանի ՌԾՈւ փոխծովակալ Հաբիբոլահ Սայարին: Փոխանցում է իրանական «Թասնիմ» լրատվական գործակալությունը:
Սա առաջին անգամն է, որ Ատլանտյան օվկիանոս է մուտք գործել իրանական ռազմանավ, և ըստ Սայարիի` Իրանն ապագայում նույնպես շարունակելու է ռազմանավեր ուղարկել Ատլանտյան օվկիանոս:
Իրանի ՌԾՈւ 44-րդ նավատորմիղը իրանական քաղաքացիական, առևտրային նավերի անվտանգությունը ծովահեններից ապահովելու համար 2016թ. հոկտեմբերի 5-ին ուղևորվել էր Ատլանտյան օվկիանոսում և Աֆրիկայի միջազգային ջրերում հերթապահության:
Արդեն հոկտեմբերի 17-ին նավատորմիղը Ադենի ծովածոցում հետ էր մղել իրանական առևտրային նավերի վրա ծովահենների հարձակումը:
Իրանական ռազմանավերը Ադենի ծովածոցում և Կարմիր ծովում հերթապահություն անում են սկսած 2008 թվականից, երբ ծովահենները առևանգել էին իրանական բեռնատար նավ:
Նշենք նաև, որ միաժամանակ Հաբիբոլահ Սայարին հայտարարել է, որ ՌԾՈւ զարգացման ծրագրի շրջանակներում՝ երկրի հարավ-արևելքում՝ Մեքրանի ափերին ստեղծվելու է 3 ռազմածովային գոտի և 2 բազա:
Pingback: Իրանական ռազմանավերը ստիպված կանգնել են Հարավային Աֆրիկայում վերանորոգման | Ռազմ.info