Իրաքի ՆԳՆ հետախուզության և հակաահաբեկչական ծառայության ղեկավար Աբու Ալի Բասրին հերքել է «Իսլամական պետություն» ահաբեկչական խմբավորման առաջնորդ Աբու Բաքր ալ-Բաղդադիի մահվան մասին տեղեկությունները՝ հայտարարելով, որ նա ողջ է և գտնվում է Սիրիայում։ Այս մասին հուլիսի 16-ին տեղեկացնում է արաբական «ալ-Արաբիա» հեռուստաալիքի կայքը։
Ալ-Բաղդադիի մահվան լուրերը հերքել է նաև Իրաքյան Քրդստանի հետախուզության և հակաահաբեկչական ծառայության ղեկավար Լահուր Թալաբանին։ Հուլիսի 17-ին «Reuters» գործակալությանը տված հարցազրույցում նա հայտարարել է, որ «99 տոկոս հավանականությամբ ալ-Բաղդադին ողջ է»։
ԻՊ առաջնորդ Աբու Բաքր Ալ-Բաղդադին
Ավելի վաղ Al-Sumaria հեռուստաալիքը տեղեկացրել էր, որ «Իսլամական պետություն» ահաբեկչական խմբավորման զինյալները հաստատել են ալ-Բաղդադիի մահվան մասին լուրերը՝ առանց մահվան հանգամանքների վերաբերյալ մանրամասներ ներկայացնելու։
Մինչ այդ Ռուսաստանի պաշտպանության նախարարությունը հայտարարել էր, որ հավանականություն կա, որ Ռուսաստանի ռազմաօդային ուժերի ավիահարվածից սպանվել է Աբու Բաքր ալ-Բաղդադին: Ըստ ՌԴ ՊՆ-ի այդ հայտարարության՝ Բաղդադին ենթադրաբար սպանվել է Սիրիայի Ռաքքա քաղաքի հարավային մասում մայիսի 28-ին՝ ԻՊ մյուս պարագլուխների հետ հավաքի ժամանակ:
Նախկինում նույնպես մամուլում պարբերաբար տեղեկություններ են հայտնվել Ալ-Բաղդադիի սպանության մասին, սակայն դրանք չեն հաստատվել:
Աբու Բաքր ալ-Բաղդադին երկար դադարից հետո առաջին անգամ 2016-ի սեպտեմբերին երևացել էր Իրաքում ԻՊ «կենտրոն» և հիմնական հենակետ Մոսուլի թաղամասերից մեկում: Ըստ տեղեկությունների՝ քաղաքում լարված իրավիճակից դրդված՝ ալ-Բաղդադին լքել է իր թաքստոցը և շրջել Մոսուլի թաղամասերից մեկում: Այնուհետև Մոսուլում իրավիճակի սրման ժամանակ տեղեկություններ էին տարածվել, որ ալ-Բաղդադին լքել է քաղաքը:
2014թ. հենց Մոսուլում էր ալ-Բաղդադին հայտարարել էր «Խալիֆայության» ստեղծման մասին։
Ալ-Բաղդադին համարվում է աշխարհի ամենապահանջված մարդը, ում գլխի համար ԱՄՆ-ն սահմանել է մինչև 25 միլիոն ԱՄՆ դոլար: Նա ահաբեկչական խմբավորումը գլխավորում է 2010 թվականից։