Մայիսի 16-ին Սիրիայի արևմտյան Հոմս քաղաքի Ալ-Վաեր թաղամասից իրենց ընտանիքների հետ միասին դուրս է բերվել զինյալ խմբավորումների անդամների 10-րդ խումբը։ Ընդհանուր առմամբ դուրս է բերվել 2600 հոգի, որից 460-ից ավելին զինյալներն են։
Այս մասին տեղեկացնում է սիրիական SANA լրատվական գործակալությունը։
The tenth evacuation convoy leaves #AlWaer besieged neighborhood in Homs to #Idlib city on May 16 #SNHRhttps://t.co/PCbcjSLMxQ pic.twitter.com/Rzi1XjJdBi
— Syrian Network (@snhr) May 16, 2017
Զինյալները տեղափոխվել են Իդլիբ, որտեղ կենտրոնացած են տարբեր խմբավորումներ:
Ավելի վաղ Հոմսից դուրս էր եկել ևս 260 զինյալ։ Հոմսի նահանգապետ Թալա ալ-Բարազին հայտարարել էր, որ Ալ-Վաեր թաղամասից զինյալների վերջին խումբը դուրս է գալու մայիսի 20-ին: Ինչից հետո սկսվելու են վերանորոգման և ենթակառուցվածքների վերագործարկման աշխատանքները:
Զինյալների՝ Ալ-Վաեր թաղամասից դուրս գալու հարցի շուրջ Սիրիայի կառավարությունը և Սիրիայի զինյալ ընդդիմադիր խմբավորումները համաձայնության էին եկել մարտի 13-ին։
Ալ-Վաերը Հոմսի միակ թաղամասն էր, որտեղ դեռ մնացել են զինյալ խմբավորումներ: Այն զինյալները, ովքեր ընդունել են համաձայնությունը, ստանալու են իրավական կարգավիճակ, իսկ ովքեր չեն ընդունել, իրենց ընտանիքների հետ միասին տեղափոխվելու են Հոմսից: