Սեպտեմբերի 20-ին Իրանում հանդիպել են Իրաքի բանակի ռազմաօդային ուժերի հրամանատար, գեներալ Անվար Ամինը և Իրանի իսլամական հեղափոխության պահապանների կորպուսի (ԻՀՊԿ) օդատիեզերական ուժերի հրամանատար, բրիգադային գեներալ Ամիր Ալի Հաջիզադեն։ Այս մասին տեղեկացնում է իրանական «Թասնիմ» լրատվական գործակալությունը։
Հանդիպման ընթացքում կողմերը քննարկել են երկկողմ համագործակցությանը վերաբերող հարցեր։
Հանդիպմանը հրամանատարները անդրադարձել են Իրաքի Քրդստանի անկախության հանրաքվեին, շեշտել, որ դրա անցկացումը բացասական ազդեցություն կարող է ունենալ տարածաշրջանի վրա։
Անդրադառնալով «Իսլամական պետություն» ահաբեկչական խմբավորման դեմ պայքարում երկրների համագործակցությանը՝ Ամիր Ալի Հաջիզադեն հայտարարել է, որ Իրանը շարունակում է խորհրդատվական աջակցություն տրամադրել Իրաքին։
«ԻՀՊԿ օդատիեզերական ուժերը Իրաքի վրա ԻՊ հարձակման հենց սկզբից խորհրդատվական, տեխնիկական, ուսումնական աջակցություն են տրամադրել Իրաքի ռազմաօդային ուժերին և այդ գործընթացը մինչև հիմա շարունակվում է»- ասել է Հաջիզադեն։
Նշենք, որ ավելի վաղ Իրանի նախագահ Հասան Ռոհանին հայտարարել էր, որ «Իսլամական պետություն» ահաբեկչական խմբավորման դեմ մղած պայքարում Իրանը աջակցել է Իրաքին՝ սպառազինություն մատակարարելով Իրաքին։
Հիշեցնենք նաև, որ ավելի վաղ Իրանի ազգային անվտանգության գերագույն խորհրդի քարտուղար Ալի Շամխանին հայտարարել էր, որ Իրանը ճանաչում է Իրաքի տարածքային ամբողջականությունը, և եթե Իրաքի Քրդստանը անկախանա, ապա Իրանը կփակի նրա հետ ընդհանուր սահմանը։