«Իսլամական պետություն» ահաբեկչական խմբավորման դեմ մղած պայքարում Իրանը աջակցել է Իրաքին՝ սպառազինություն մատակարարելով Իրաքին։ Այս մասին հուլիսի 11-ին հայտարարել է Իրանի նախագահ Հասան Ռոհանին։ Փոխանցում է BBC Farsi լրատվական գործակալությունը։
Իրաքի՝ Իրանից ստացած Սու-25 գրոհիչ ինքնաթիռներից մեկը, (արխիվ)
Ըստ Ռոհանիի՝ Իրանը օգնել է Իրաքին անգամ այն պայմաններում, երբ գտնվում էր ծանր պատժամիջոցների տակ։
«Երբ մենք ասում ենք՝ օգնել ենք Իրաքի ժողովրդին, ոմանք առաջին հերթին մարդկային զոհաբերությունն են հասկանում: Դա կա, ճիշտ է, ոմանք զոհել են իրենց, և մենք պետք է գնահատենք նրանց, սակայն այդ մարդկանց զենքերը ո՞վ էր ապահովում։ Երբ Իրաքը «Իսլամական պետության» դեմ էր պայքարում, այդ ո՞վ էր պատժամիջոցների առկայության պայմաններում զենք մատակարարում։
Ռոհանիի հայտարարության համաձայն՝ «Իրանը նաև հոգացել է Սիրիայի կարիքները»։
Իրաքին զենքով ապահովելու մասին ավելի վաղ հայտարարել էր նաև Իրանի իսլամական հեղափոխության պահապանների կորպուսի (ԻՀՊԿ) «Ղոդս» ստորաբաժանման հրամանատար Ղասեմ Սոլեյմանին։
Հիշեցնենք, որ 2014-ին «Ռոյթերս» լրատվական գործակալությունը հաղորդել էր, որ 2013-ի նոյեմբերի վերջին Իրանը և Իրաքը սպառազինության մատակարարման մասին 8 պայմանագիր են կնքվել: Պայմանագրերի արժեքը 195 մլն ԱՄՆ դոլար էր գնահատվում։ Սակայն Իրանը հերքել էր այս լուրը։
Այնուամենայնիվ, չնայած Իրանի հերքումներին և պաշտոնական տվյալների սակավությանը՝ լրատվամիջոցներում մշտապես հայտնվել են լուսանկարներ, որտեղ երևացել են, թե ինչպես են իրաքցի և սիրիացի զինծառայողները օգտագործում իրանական արտադրության տարբեր զինատեսակներ՝ անօդաչու թռչող սարքեր, դիպուկահար հրացաններ, զրահամեքենաներ և այլն։
Իրանը համարվում է Իրաքի և Սիրիայի դաշնակիցը «Իսլամական պետություն» ահաբեկչական խմբավորման դեմ պայքարում։ Սակայն Իրանը մշտապես հերքում է, որ ռազմական ստորաբաժանումներ ունի այս երկրներում և իր օգնությունը որակում է որպես «խորհրդատվական»։ Իսկ Սիրիայում և Իրաքում զոհվող իրանցի մարտիկները, ըստ Իրանի, կամավորներ են։
Իրանական արտադրության դիպուկահար հրացանը Իրաքի զինծառայողի ձեռքում
Մինչ օրս Սիրիայում Իրանի ունեցած կորուստները ավելի շատ են, քան Թուրքիայի և Ռուսաստանի կորուստները միասին վերցրած։ Մարտին Իրանի շահիդների և վետերանների միության ղեկավար Մուհամեդ Ալի Շահիդի Մահալաթին հայտարարել էր, որ Սիրիայում և Իրաքում մինչև այժմ սպանվել է Իրանի կողմից ուղարկված 2100 մարտիկ։
Սիրիայում և Իրաքում Իրանի գործողությունները համակարգում է ԻՀՊԿ «Ղոդս» ստորաբաժանումը՝ Ղասեմ Սոլեյմանիի հրամանատարությամբ։