Իրանի ռազմածովային ուժերի 46-րդ նավատորմը անցել է միջազգային ջրերում իրանական քաղաքացիական և առևտրային նավերի անվտանգություն ապահովմանը: Այս մասին հայտնում է իրանական «Ֆարս» լրատվական գործակալությունը:
«Լավան» ռազմանավից և «Սաբալան» թիկունքային ապահովման նավից բաղկացած Իրանի ՌԾՈւ 46-րդ նավատորմը մեկնել է միջազգային ջրերում Իրանի ՌԾՈւ 45-րդ նավատորմի առաքելության ավարտից հետո:
Իրանի ՌԾՈւ 45-րդ նավատորմն իր առաքելության շրջանակներում ապրիլի 9-ին 3-օրյա պաշտոնական այցով ժամանել էր Պակիստան և այդ երկրի ռազմածովային ուժերի հետ համատեղ ծովային վարժանքներ արել:
Իրանական ռազմանավերը հիմնականում հսկողություն են իրականացնում Պարսից և Ադենի ծոցերում և Կարմիր ծովում՝ ծովահեններից իրանական քաղաքացիական և առևտրային նավերը պաշտպանելու համար:
2016-ի հոկտեմբերին նավախմբին հաջողվել է Ադենի ծովածոցում հետ մղել իրանական 2 առևտրային նավերի վրա ծովահենների հարձակումները: Ծովահենների մեկ այլ հարձակում նավախումբը կանխել է 2017-ի փետրվարին, Բաբ էլ Մանդեբի նեղուցում։