Օգոստոսի 22-ին Ռուսաստանի ՊՆ–ն «Армия 2018» միջազգային ֆորումի շրջանակներում կնքելու է 5-րդ սերնդի Սու-57 (հայտնի է նաև Տ-50 գործարանային ինդեքսով) առաջին երկու կործանիչների մատակարարման պայմանագիրը։ Այս մասին հայտնում է ռուսական «Ինտերֆաքս» լրատվականը։
Ըստ աղբյուրի՝ օգոստոսի 19-ին ռուսական Միավորված ավիաշինական կորպորացիայի («Объединённая авиастроительная корпорация» («ОАК»)) նախագահը հայտնել էր, որ իրենք մինչև ամառվա վերջ ՊՆ–ի հետ կկնքեն կործանիչների մատակարարման պայմանագիրը։
Նախագահը նշել է, որ նախատեսվում է 12 ինքնաթիռի գնում, կործանիչների մատակարարումը կսկսվի մյուս տարվանից։
Հետաքրքիր է, որ այս տարվա փետրվարին Սիրիայում Ռուսաստանի ռազմաօդային ուժերի «Հմեյմիմ» ավաբազա էր ժամանել երկու միավոր նոր սերնդի Սու-57 կործանիչ։
Արբանյակային լուսանկարների հետազոտությամբ զբաղվող Imagesat կայքը ներկայացրել էր ավիաբազայում կայանած կործանիչները․
Սու-57-ը ռուսաստանյան արտադրության նոր սերնդի կործանիչ է: Կործանիչի առաջին թռիչքը իրականացվել է 2010 թվականին: 2010-2017 թթ. ընթացքում արտադրվել է 10 միավոր Սու-57 (Տ-50) կործանիչ, այդ թվում 3 միավորը ստեղծվել է 2017 թվականին:
Հավելենք, որ օգոստոսի 20-ին էլ սառեցվել է Հնդկաստան–Ռուսաստան Սու–57-երի արտադրման համատեղ 10 մլրդ դոլարի ծրագիրը։ Մինչ այդ Հնդկաստանի ռազմաօդային ուժերի հրամատարությունը պարբերաբար իր դժգոհությունն է հայտնել ռուսական կողմին և անգամ պահանջել է դադարեցնել նախագիծը, քանի որ ըստ հնդկական կողմի կործանիչը իր բնութագրերով չի համապատասխանում ամերիկյան F-35-ին։