Աստանայում որոշվել է Սիրիայի հրադադարի պահպանման երաշխիքներ ստեղծել

Հունվարի 24-ին Աստանայում ավարտվել են սիրիական ճգնաժամի լուծման համար պաշտոնական Դամասկոսի և Սիրիայում տարբեր զինյալ խմբավորումների միջև բանակցությունները:

Որոշվել է որպես Սիրիայում զինադադարի պահպանման երաշխիք ստեղծել վերահսկողության եռակողմ մեխանիզմ՝ օպերատիվ խումբ, Իրանի, Ռուսաստանի և Թուրքիայի գլխավորությամբ: Նախատեսվում է, որ երկրները հետևողական են լինելու, որպեսզի կողմերը չխախտեն կրակի դադարեցման պայմանավորվածությունը կամ դրանք հասցնել նվազագույնի:

Աստանայի բանակցություններում Սիրիայի զինված ընդդիմության ներկայացուցիչներից

Անհրաժեշտության դեպքում օպերատիվ խմբի աշխատանքներին կարող են ներգրավվել նաև Սիրիայի զինված ուժերի և զինված ընդդիմության ներկայացուցիչներ: Այս մասին հայտնել է Աստանայի բանակցություններում ՌԴ նախագահի հատուկ ներկայացուցիչ Ալեքսանդր Լավրենտևը, փոխանցում է «ՌԻԱ Նովոստի» գործակալությունը:

Սիրիայի ընդդիմադիրների պատվիրակության ներկայացուցիչի խոսքով՝ իրենք ներկայացրել են զինադադարի պահպանման վերահսկողության մեխանիզմի նախագիծ, ռուսաստանյան կողմը հավաստիացրել է, որ 1 շաբաթվա ընթացքում կուսումնասիրեն այն և վերջնական որոշում կկայացնեն 7 օրից՝ Աստանայում կայանալիք թուրքական կողմի հետ հանդիպման ընթացքում:

Աստանայի բանակցությունները կշարունակվեն Ժնևում, փետրվարի 8-ին:

Հունվարի 23-ին մեկնարկած բանակցություններին մասնակցում են Ռուսաստանի, Թուրքիայի, Իրանի պատվիրակությունները, ինչպես նաև Սիրիայի հարցերով ՄԱԿ-ի հատուկ ներկայացուցիչ Ստեֆան դե Միստուրան: Ղազախստանի փոխարտգործնախարար Ռոման Վասիլենկոն հայտարարել է, որ բանակցություններին ընդգրկված են Սիրիայի շուրջ 15 ընդդիմադիր զինյալ խմբավորումների ներկայացուցիչներ:

Հիշեցնենք, որ Սիրիական կառավարությունը և զինյալ խմբավորումները համաձայնել են Թուրքիայի և Ռուսաստանի երաշխավորությամբ դեկտեմբերի լույս 30-ի կեսգիշերից հրադադար հաստատել: Հրադադարը չի տարածվում «Իսլամական պետություն», «ալ-Նուսրայի Ճակատ» ահաբեկչական խմբավորումների վրա, ինչպես նաև այն խմբավորումների, որոնք կխախտեն հրադադարի ռեժիմը։