Հոկտեմբերի 9-ին «Իսլամական պետություն» ահաբեկչական խմբավորումը հարձակվել է Իրաքի Բեշիքա բնակավայրում «Գեդու» ռազմաբազայի վրա, որտեղ տեղակայված թուրք զինվորականները մարզում են քուրդ կամավորների։
Այս մասին հայտնում է թուրքական Аnadolu գործակալությունը՝ հղում անելով անվտանգության թուրք պաշտոնյայի, ով նաև հայտնել է՝ տուժածներ չկան, զորքերը պատասխան կրակով ոչնչացրել են ԻՊ զինտեխնիկայի հենակետը և անօդաչու թռչող սարք։
Իրաքում քրդական ուժերին և իրաքյան զոինծառայողներին մարզող Թուրքիայի ԶՈւ հատուկջոկատայիններ
Գործակալությունը այլ մանրամասներ չի հայտնում։
Իրաքի Բեշիքայի շրջանում Թուրքիան զինուժ տեղակայել է 2015թ. դեկտեմբերից: Քրդական ինքնավարության Փեշմերգե զինված ուժերին մարզելու պատրվակով՝ այստեղ է տեղակայվել հատուկջոկատայինների գումարտակ, ինչպես նաև տանկեր՝ առանց Իրաքի կենտրոնական իշխանությունների կարծիքը հաշվի առնելու։
Ռազմաբազան գտնվում է Մոսուլ քաղաքից 12 կմ հյուսիս֊արևելք, ինչը հուշում է, որ «Իսլամական պետություն» ահաբեկչական խմբավորումը շարունակում է պատրաստվել Մոսուլի ազատագրման գործողության դիմագրավմանը։ Ավելի վաղ՝ սեպտեմբերի 20-ին ԻՊ զինյալները փակել էին Մոսուլ տանող բոլոր ճանապարհները: Քաղաքի ծայրամասերում նկատվել էր զինյալների կենտրոնացում, ինչպես նաև ծանր զինտեխնիկայի կուտակում:
Նշենք, որ Իրաքի կառավարական ուժերը՝ նախատեսում են Մոսուլը ազատագրել հոկտեմբերին։ Այն Իրաքում ԻՊ կենտրոնն է և ամենադժվար թիրախներից մեկը։
Russia Today լրատվակայքը, Аl Sumaria հեռուսատաընկերությանը հղում անելով, փոխանցում է Իրաքի վարչապետ Հայդար Ալ֊Աբադիի հայտարարությունը, ըստ որի՝ Իրաքը թույլ չի տալու՝ Թուրքիան մասնակցել Մոսուլի ազատագրման գործողությանը։
Իսկ օրեր առաջ Իրաքի ԱԳՆ֊ն արտահերթ նիստ գումարելու հայցով դիմել էր ՄԱԿ-ի Անվտանգության խորհրդին` քննարկելու Իրաքի հյուսիսում թուրքական զինուժի ներկայության և Իրաքի ներքին գործերին միջամտության հարցը: