Փետրվարի 26-ին Թուրքիայի պաշտպանության նախարար Հուլուսի Աքարը հայտարարել է, որ ԱՄՆ-ն չի պատասխանել Ս-400 «Տրիումֆ» զենիթահրթիռային ՀՕՊ համակարգի հարցի լուծմանն ուղղված Թուրքիայի նամակին:
Այս մասին հայտնում է թուրքական պետական «Անադոլու» լրատվական գործակալությունը: Աքարը նշել է, որ ռուսական Ս-400 ՀՕՊ համակարգերի մատակարարմամբ պայմանավորված՝ Թուրքիայի դեմ ԱՄՆ-ի պատժամիջոցները չեն համապատասխանում ՆԱՏՕ-ի դաշնակցային ոգուն:
Թուրքիայի պաշտպանության նախարարը նաև ասել է, որ բազմիցս առաջարկել է ՆԱՏՕ-ին և ԱՄՆ-ին տեխնիկական համատեղելիության հարցերը քննարկելու համար ստեղծել համատեղ աշխատանքային խումբ, սակայն այդ առաջարկները չեն արժանացել հավանության:
Հիշեցնենք, որ Ս-400 զենիթահրթիռային ՀՕՊ համակարգերի գնման պայմանագիրը Թուրքիայի և Ռուսաստանի միջև ստորագրվել է 2017թ.։ Առաջին խմբաքանակը Թուրքիա մատակարարվեց 2019թ. հուլիսի 12-ից սկսած։ ԱՄՆ-ն բազմիցս պահանջել էր Թուրքիային չգնել Ռուսաստանից Ս-400-ները՝ սպառնալով պատժամիջոցներ կիրառել: Արդյունքում Թուրքիան զրկվել է ամերիկյան հինգերորդ սերնդի F-35 կործանիչները գնելու հնարավորությունից, իսկ Պենտագոնի մամուլի խոսնակ Ջոն Քիրբին հայտարարել է, որ ԱՄՆ նորընտիր նախագահ Ջո Բայդենը չի պատրաստվում Թուրիքային կործանիչների վաճառքի արգելքը վերացնել։