Թուրքիայում նախատեսում են, որ հնարավոր բացասական սցենարների դեպքում (եթե չհաջողվի ստեղծել տեղական շարժիչներ), տեղական արտադրության «Ալթայ» տանկերի միայն շարժիչները կլինեն ոչ թուրքական:
Այս մասին Թուրքիայի պաշտպանական արդյունաբերության գլխավոր վարչության (ՊԱԳՎ) պետ Իսմայիլ Դեմիրը մայիսի 7-ին տեսակապով հայտնել է C4Defence թուրքական մասնագիտացված կայքին:
Անդրադառնալով «Ալթայ» տանկերի շարժիչների արտադրության հետ կապված խնդիրներին՝ ՊԱԳՎ պետը հայտնել է, որ արտադրական աշխատանքները, որոնցում ներգրավված են նաև օտարերկրյա ընկերություններ, դրական են ընթանում: ՊԱԳՎ պետը նշել է, որ մի երկրի հետ արդեն իսկ պայմանավորվածություններ են ձեռք բերվել, սակայն չի հայտնել, թե որ երկրի:
Հարկ է նշել, որ թուրքական տանկի արտադրության հիմնական խնդիրը շարունակում է մնալ հենց շարժիչների արտադրությունը: Մի քանի անգամ տապալվել են այլ երկրներից ներմուծելու տարբերակները, ինչպես նաև հենց Թուրքիայում դրանց արտադրության ծրագրերը:
Ուշագրավ է, որ նախկինում հայտարարվել էր, որ ամենայն հավանականությամբ տեղական տանկերն արտադրվելու էին թուրք-կատարական BMC ռազմարդյունաբերական ընկերության դուստր ձեռնարկություն BMC Power-ի տեղական արտադրության շարժիչներով, որոնց միայն նախատիպերն ընկերությունը նախատեսում է ներկայացնել 39 ամսից (~3,5 տարի)։
Հավելենք, որ 2018 թ. նոյեմբերի 9-ին ՊԱԳՎ և BMC ընկերության միջև ստորագրվել է «Ալթայ» տանկերի սերիական արտադրության պայմանագիր։ BMC ընկերության նախագահ Էթհեմ Սանջաքը պայմանագրի ստորագրման միջոցառմանը հայտարարել էր, որ թե՛ ՊԱԳՎ-ի, թե՛ Թուրքիայի զինված ուժերի պայմանն է եղել ստեղծել 100 տոկոս տեղական արտադրության տանկեր։