Մայիսի 8-ին Թուրքիայի ՆԳՆ Ժանդարմերիային է մատակարարվել տեղական արտադրության 3 միավոր Bayraktar TB2 անօդաչու թռչող սարք (ԱԹՍ)` երկրի անվտանգության գերատեսչությունների ենթակայության տակ եղած նույն ԱԹՍ-ների ընդհանուր քանակը հասցնելով 107-ի:
Այս մասին թվիթերյան իր միկրոբլոգում գրել է Թուրքիայի պաշտպանական արդյունաբերության գլխավոր վարչության (ՊԱԳՎ) պետ Իսմայիլ Դեմիրը։
Նշենք, որ կա «Բայրաքթար» ԱԹՍ-ի երկու տարբերակ՝ հետախուզական և հարվածային: ԱԹՍ-ի երկու տարբերակներն էլ առկա են Թուրքիայի ԶՈւ սպառազինությունում և կիրառվել են մարտական պայմաններում:
Վերջին շրջանում Բայրաքթար ԱԹՍ֊ների մեծ կորուստներ Թուրքիան ունեցել է Լիբիայում, որտեղ ԱԹՍ֊ներն ուղարկվել էին որպես աջակցություն Լիբիայի արևելքում ՄԱԿ-ի և Եվրոպայի աջակցությամբ 2015 թվականից իշխանություն հաստատած «Ազգային համաձայնության կառավարությանը»։
«Բայրաքթար» ԱԹՍ-ի մարտավարատեխնիկական բնութագիրը․
- Գործողության շառավիղը՝ 150 կմ,
- Առավելագույն թռիչքային զանգվածը՝ 650 կգ,
- Օգտակար բեռնատարողությունը՝ 150կգ,
- Առավելագույն արագությունը՝ 222 կմ/ժ,
- Թռիչքի տևողությունը՝ առավելագույնը 24ժ,
- Թևերի բացվածքը՝ 12 մ,
- Երկարությունը 6,5 մ,
- Սարքը կարող է ինքնուրույն օդ բարձրանալ և վայրէջք կատարել։