Թուրքիան «Ալթայ» տանկերը կարտադրի թուրքական BMC ընկերության հետ

Նոյեմբերի 9-ին Թուրքիայի պաշտպանական արդյունաբերության գլխավոր վարչության (ՊԱԳՎ) և թուրք-կատարական BMC ռազմարդյունաբերական ընկերության միջև ստորագրվել է «Ալթայ» տանկերի սերիական արտադրության պայմանագիր։

Այս մասին հայտնել է ՊԱԳՎ պետ Իսմայիլ Դեմիրը։

SSB ile BMC arasında ALTAY Seri Üretim Projesi Sözleşmesi imzalandı. Proje, 250 adet ALTAY ana muharebe tankının seri üretimi ile birlikte ömür devri lojistik desteği ile TSTM kurulumu ve işletilmesini kapsıyor. İlk ALTAY tankı 18 ay sonra KKK'ya teslim edilecek. Hayırlı olsun. pic.twitter.com/IYiMhxwtBd

— Ismail Demir (@IsmailDemirSSB) November 9, 2018

Նշվում է, որ առայժմ նախատեսվում է 250 միավոր տանկի արտադրություն։ Առաջին «Ալթայ» տանկը նախատեսվում է Թուրքիայի ցամաքային ուժերին մատակարարել 2020թ․՝ 18 ամիս անց։

Թուրքական «Ալթայ» ազգային տանկը IDEF-2015 ցուցահանդեսում

Բրիտանական «Ջեյնս» ռազմական հանդեսում նշվում է, որ BMC ընկերության նախագահ Էթհեմ Սանջակը պայմանագրի ստորագրման միջոցառմանը հայտարարել է՝ թե՛ ՊԱԳՎ–ի, թե՛ Թուրքիայի զինված ուժերի պայմանն է եղել ստեղծել 100 տոկոս տեղական արտադրության տանկեր։

Ամենայն հավանականությամբ տանկերը զանգվածային արտադրության կդրվեն BMC ընկերության դուստր ձեռնարկություն BMC Power-ի  տեղական արտադրության շարժիչներով, որոնց միայն նախատիպերը ընկերությունը նախատեսում է ներկայացնել 68 ամսից (~5,5 տարի)։

2018թ․ հունիսին ընկերությունը սկսել է «Ալթայ» տանկերի համար ուժային խմբի ստեղծման ծրագիրը։ Նախատեսվում է այս տանկերի համար ստեղծել 1500 ձիաուժ հզորությամբ շարժիչներ։ Ծրագրի ավարտից հետո միայն ՊԱԳՎ-ի հետ քննարկվելու է սերիական արտադրությունը։

Ընկերությունը այս տարվա սեպտեմբերին SAHA expo 2018 ցուցահանդեսին ներկայացրել է բեռնատարների համար նախատեսված տեղական շարժիչները․

BMC POWER Yerli Motoruyla SAHA EXPO'da. #SahaExpo pic.twitter.com/doztZEHihO

— BMC POWER (@BmcPowerResmi) September 13, 2018

Քանի որ նախատեսվում է տանկերը արտադրել բացառապես տեղական արտադրության մասերով, թուրքական կողմը դադարեցրել է համագործակցությունը նաև գերմանական Rheinmetall ընկերության հետ:

Սակայն ուշագրավ է, որ ՊԱԳՎ պետ Իսմայիլ Դեմիրը նշել է, որ տանկի առաջին նախատիպը կունենա արտասահմանյան շարժիչ, իսկ ամբողջությամբ տեղական արտադրությունը նախատեսված է հետագայում։ Թե արտասահմանյան որ ընկերության շարժիչը կլինի դա, չի նշվում։

Այսինքն՝ 18 ամիս անց ներկայացվող առաջին «Ալթայ» տանկը լինելու է արտասահմանյան շարժիչով, իսկ թե երբ կլինեն տեղական արտադրության շարժիչներով տանկերը, դեռևս անհայտ է։ Իսկ հավանական շարժիչների նախատիպերը պատրաստ կլինեն լավագույն դեպքում 5-5,5 տարում։

Նշենք, որ «Ալթայ» տանկերի արտադրության համար 2007թ․ Թուրքիայի պաշտպանական արդյունաբերության նախարարությունը պայմանագիր էր կնքել թուրքական «Օթոքար» ռազմարդյունաբերական ընկերության հետ։ Սակայն 2017թ․ հունիսին նախարարությունը չեղարկեց «Օթոքար» ընկերության հետ այս տանկերի զանգվածային արտադրության պայմանագիրը: Նշվում էր, որ «Օթոքարի» առաջարկած գինը հարմար չէ, ինչի պատճառով որոշել են նոր մրցույթ հայտարարել:

Մինչ այդ՝ 2017 թ. փետրվարի 24-ին, Թուրքիայի պաշտպանական արդյունաբերության գլխավոր վարչությունը չեղարկել է «Թյումոսան» (Tümosan) ընկերության հետ «Ալթայ» տանկերի համար շարժիչների արտադրության նախագծի պայմանագիրը:

Թուրքական արտադրության «Ալթայ» մարտական տանկի նախատիպ

«Ալթայ» տանկի նախագիծը հիմնված է հարավկորեական K2 Black Panther տանկի լուծումների վրա։ Հարավկորեական տարբերակի շարժիչն արտադրում է գերմանական MTU ընկերությունը: «Ալթայ» տանկի համար ևս փորձ արվեց համագործակցել MTU ընկերության հետ, սակայն արդյունքում ստեղծվեց միայն տանկի 4 նախատիպ։ Այս համագործակցությունը չեղարկվեց, քանի որ MTU-ն, ինչպես նաև այլ գերմանական ընկերություններ, պետք է հետևեն, որ տանկերը հետագայում չհայտնվեն զենքի վաճառքի էմբարգոյի գերմանական ցուցակի երկրներում, այդ թվում նաև՝ Ադրբեջանում:

Տանկերի արտադրությունը սկսելու հիմնական խնդիրը շարժիչի հարցն էր, որի արտադրության համար դիմել էին հինգ ընկերություններ․

• BMC զրահատեխնիկա արտադրող ընկերությունը,
• Figes Fizik սիմուլյատորներ արտադրող ընկերությունը,
• Ստամբուլի նավաշինական գործարանը,
• TAI ավիաշինական ընկերությունը,
• «Թյումոսան» շարժիչաշինական ընկերությունը: