Ռուսաստանի ԶՈւ Հարավային ռազմական շրջանի՝ Հայաստանում տեղակայված 102–րդ ռազմաբազայի ավիացիոն ստորաբաժանումները այսօր՝ փետրվարի 20–ին, վարժանքների ընթացքում բարձր լեռնային գոտուց «էվակուացրել են» պայմանական վիրավորներին։
Այս մասին հայտնում է ՌԴ ՊՆ կայքը։
Գործողություններին ներգրավվել են Մի–8ՄՏԲ տրանսպորտային և Մի–24Պ հարվածային ուղղաթիռներ։ Վարժանքները պլանային են, որոնց այս փուլը սկսվել է փետրվարի 4–ին և տևելու է մինչև մարտի 10–ը։ Ընդհանուր առմամբ, վարժանքներին պլանավորված է 1000 զինծառայողի մասնակցություն և 200 միավոր զինտեխնիկայի ներգրավվածություն՝ այդ թվում ՄիԳ–29 կործանիչներ։
Հիշեցնենք, որ փետրվարի 7–ին ռազմաբազայի տանկային ստորաբաժանումներն էին դուրս եկել վարժանքների, իսկ փետրվարի 10–ին՝ հետախույզները։
Ռուսաստանի ԶՈւ հարավային ռազմական շրջանի ստորաբաժանումները տեղակայված են Ռուսաստանի հարավում, Կովկասյան տարածքներում, Ղրիմում, Հարավային Օսեթիայում և Աբխազիայում։ Ռազմական շրջանը իր գործուն մասնակցությունն ունի սիրիական պատերազմում։ Այս ռազմական շրջանին են ենթարկվում նաև ՌԴ ՌԾՈւ Սևծովյան նավատորմն ու Կասպյան նավատորմիղը։