Թուրքիայի նախագահ Էրդողանը, ի պատասխան ԱՄՆ պատժամիջոցների, հրամայել է արգելափակել ԱՄՆ արդարադատության և ներքին գործերի նախարարների սեփականությունը Թուրքիայում։ Այս մասին Էրդողանը տեղեկացրել է Թուրքիայի իշխող Արդարություն և զարգացում կուսակցության կանանց թևի օգոստոսի 4–ի համագումարի ժամանակ։
Այս մասին հայտնում է թուրքական «Ջումհյուրիեթ» պարբերականը։
Էրդողանը մասնավորապես ասել է․
«Մենք մինչև երեկ երեկո համբերել ենք։ Այսօր ընկերներիս հրաման եմ տվել․ Ամերիկայի արդարադատության և ներքին գործերի նախարարների Թուրքիայում եղած սեփականությունը արգելափակում ենք․․․ Եթե հավատարիմ գործունեություն ենք ծավալում, ուրեմն եկեք անենք այն, ինչ հարկավոր է մեր համագործակցությանը։ Մենք Սոմալիում, Աֆղանստանում միասին չե՞նք։ Մենք ՆԱՏՕ-ում միասին լինելու համար միասին քայլ չե՞նք արել․․․»։
Նշենք, որ ԱՄՆ–ն օգոստոսի 1-ին պատժամիջոցներ է սահմանել Թուրքիայի արդարադատության և ներքին գործերի նախարարների նկատմամբ՝ պահանջելով ետ վերադարձնել ԱՄՆ քաղաքացի, քահանա Էնդրյու Բրանսոնին, որը մեղադրվում է Թուրքիայում ահաբեկչական կազմակերպություն համարվող Գյուլենականների հետ կապի համար։
Երկու նախարարների ամբողջ գույքը, որը ԱՄՆ իրավասության տակ է, արգելափակվել է։ Արգելվել է նաև նախարարների մուտքը ԱՄՆ, իսկ Ամերիկայի քաղաքացիները չպետք է որևէ գործարքի մեջ մտնեն այս նախարարների հետ։
Իսկ օգոստոսի 3-ին Թուրքիայի արտգործնախարար Մևլյութ Չավուշօղլուն և ԱՄՆ պետքարտուղար Մայք Պոմպեոն Սինգապուրում ընթացող Հարավարևելյան Ասիայի պետությունների միության անդամ երկրների ԱԳ նախարարների ժողովի ընթացքում հանդիպել և քննարկել էին ԱՄՆ սահմանած պատժամիջոցները։
Նշենք նաև, որ ԱՄՆ—Թուրքիայի հարաբերությունների վերջին զարգացումները կապված են Թուրքիայում ձերբակալված ԱՄՆ քաղաքացի, քահանա Էնդրյու Բրանսոնի հարցի հետ։ Վերջինս մեղադրվում է Թուրքիայում ահաբեկչական կազմակերպություն համարվող Գյուլենականների հետ կապի համար։