Իրանի ոստիկանական ուժերը ձերբակալել են Պարսից ծոցի Քիշ կղզում իրանական նավերի վրա հարձակում կատարած 5 զինված ծովահենի։ Ծովահենները հայտնաբերվել են երկրի հարավային Բուշեհր նահանգի Քենգան շրջանում։Այս մասին հունիսի 13-ին հայտնում է իրանական «Մեհր» լրատվական գործակալությունը։
Ծովահեններից առգրավվել են ԱԿ-47 ավտոմատներ, փամփուշտներ։
Ծովահեններից իրանական քաղաքացիական և առևտրային նավերը պաշտպանելու համար Իրանը նաև նավախմբեր է ուղարկում միջազգային ջրերում հերթապահության։ Նավախմբերը հիմնականում հսկողություն են իրականացնում Պարսից և Ադենի ծոցերում, Կարմիր ծովում։
Ավելի վաղ Իրանի Բանդարաբաս նավահանգստից միջազգային ջրերում հերթապահության էր ուղևորվել Իրանի բանակի ռազմածովային ուժերի 47-րդ նավախումբը։ Նավախմբում հերթապահում են «Ալբորզ» հրթիռային նավը և «Բուշեհր» թիկունքային ապահովման նավը:
Նավախումբը հերթապահության է ուղարկվել միջազգային ջրերում բանակի ՌԾՈւ 46-րդ նավախմբի առաքելության ավարտից հետո։
Ապրիլին Իրանը միջազգային ջրերում հերթապահության էր ուղարկել «Լավան» ռազմանավից և «Սաբալան» թիկունքային ապահովման նավից բաղկացած Իրանի ՌԾՈւ 46-րդ նավատորմը։
Իսկ ավելի վաղ՝ 2016-ի հոկտեմբերին, Իրանի ՌԾՈւ 44-րդ նավախմբին հաջողվել էր Ադենի ծովածոցում հետ մղել իրանական 2 առևտրային նավերի վրա ծովահենների հարձակումները: Ծովահենների մեկ այլ հարձակում նավախումբը կանխել է 2017-ի փետրվարին, Բաբ էլ Մանդեբի նեղուցում։ Իրանի ՌԾՈւ 44-րդ նավախմբի կազմում էր «Ալվանդ» ռազմանավից և «Բուշեհր» թիկունքային ապահովման նավը։