Օգոստոսի 8-ին սիրիա-իրաքյան սահմանին «Իսլամական պետություն» ահաբեկչական խմբավորման զինյալները սպանել են 2 օր առաջ գերեվարած 25-ամյա իրանցի զինծառայող Մոհսեն Հոջաջիին։ Այս մասին տեղեկացնում է իրանական «Թասնիմ» լրատվական գործակալությունը։
Մոհսեն Հոջաջին Իրանի իսլամական հեղափոխության պահապանների կորպուսի (ԻՀՊԿ) Իրանի Սպահան նահանգի Նաջաֆաբադ քաղաքում տեղակայված 8-րդ զրահատանկային դիվիզիայի զինծառայող էր։
Ավելի վաղ Սիրիայի Հալեպ քաղաքում ահաբեկիչներ դեմ մղած մարտերի ժամանակ զոհվել էր Իրանի բանակի ցամաքային ուժերի զինծառայող։
Իրանը համարվում է Իրաքի և Սիրիայի դաշնակիցը «Իսլամական պետություն» ահաբեկչական խմբավորման դեմ պայքարում, բայց իրանական կոմղը մշտապես հերքում է, որ ռազմական ստորաբաժանումներ ունի այս երկրներում և իր օգնությունը որակում է որպես «խորհրդատվական»։ Իսկ Սիրիայում և Իրաքում զոհվող իրանցի մարտիկները, ըստ Իրանի, կամավորներ են։
Ավելի վաղ Իրանի նախագահ Հասան Ռոհանին հայտարարել էր, որ ԻՊ դեմ պայքարի շրջանակներում «Իրանը հոգացել է Սիրիայի կարիքները»։
Մինչ օրս Սիրիայում Իրանի ունեցած կորուստները ավելի շատ են, քան Թուրքիայի և Ռուսաստանի կորուստները միասին վերցրած։ Մարտին Իրանի շահիդների և վետերանների միության ղեկավար Մուհամեդ Ալի Շահիդի Մահալաթին հայտարարել էր, որ Սիրիայում և Իրաքում մինչև այժմ սպանվել է Իրանի կողմից ուղարկված 2100 մարտիկ։
Սիրիայում և Իրաքում Իրանի գործողությունները համակարգում է ԻՀՊԿ «Ղոդս» ստորաբաժանումը՝ Ղասեմ Սոլեյմանիի հրամանատարությամբ։