Նոյեմբերի 10-ին Վրաստանի պաշտպանության նախարար Թինա Խիդաշելին պաշտոնական առաջին այցով մեկնել է Ճապոնիա, որտեղ այդ երկրի պաշտպանության նախարար Գեն Նակատանիի հետ ստորագրել է երկու երկրների ՊՆ-ների միջև համագործակցության հուշագիր։Այս մասին հայտնում է Վրաստանի պաշտպանության նախարարության մամուլի ծառայությունը։
Վրաստանի և Ճապոնիայի պաշտպանության նախարարները հուշագրի ստորագրման ժամանակ
Ըստ հուշագրի՝ Վրաստանն ու Ճապոնիան սկսելու են բանակցություններ վարել և համագործակցել պաշտպանական համակարգերի զարգացման ուղղությամբ, փորձագետների փոխանակում են անելու, մասնակցելու են կրթական, հետազոտական ծրագրերի և սեմինարների։ Նույն օրը կայացել է Խիդաշելիի և Նակատանիի երկկողմ հանդիպումը, որտեղ քննարկվել են Վրաստանի ինտեգրացիոն գործընթացները, միջազգային առաքելությունների մասնակցությունը։
Այցի շրջանակներում Խիդաշելին եղել է Ճապոնիայի ազգային պաշտպանական ակադեմիայում, հանդիպել ակադեմիայի ղեկավար Ռիոսեի Կոկուբունի հետ։ Կնքված հուշագրի շրջանակներում հանդիպման ժամանակ քննարկվել են ռազմական կրթության ոլորտում համագործակցության հարցեր։
Խիդաշելին հույս է հայտնել, որ մոտ ապագայում վրաստանցի զինծառայողները կկարողանան սովորել Ճապոնիայում և միգուցե ռազմական կրթության ոլորտը դառնա հիմնաքարային երկու երկրների համագործակցության համար։
Վրաստանյան պատվիրակության այցն ավարտվելու է նոյեմբերի 14-ին։
Pingback: Ռազմաշաբաթ. Վրաստան. 8–14 նոյեմբերի, 2015 | Ռազմ.info