Արցախի տարածքն ականազերծող «Հալո Թրաստ» (Halo Trust) կազմակերպություն Արցախի ծրագրի ղեկավար Էշլի Բոդին հայտնել է, որ մինչև 2020 թվականը Արցախի ամբողջական ականազերծումը լրիվ իրատեսական է: Այս մասին նա հայտնել է CivilNet կայքի հետ հարցազրույցում:
«Հալո Թրաստ» կազմակերպության ականազերծման աշխատանքները Արցախում (Արցախ)
Հարցազրույցում Էշլի Բոդին նշել է «Հալո Թրաստը» աշխատում է անանուն հովանավորի հետ, և հանգանակված յուրաքանչյուր գումարի դիմաց անանուն հովանավորը փոխանցելու է ևս նույնքան գումար:
Խոսքն այն տարածքների մասին է, որոնք բնակավայրերի մերձակայքում են և ուղղակիորեն ազդում են մարդկանց առօրյա կյանքի վրա:
Բոդին հայտնում է, որ մինչ այս ականազերծվել է շուրջ 450 ականադաշտ և շուրջ 101-ն էլ պետք է ականազերծվեն, ինչը իրատեսական է նշված ժամկետների սահմաններում:
Մինչ այս՝ մարտի 17-ին, կազմակերպության արցախյան բաժնի Թվիթերում նշվում էր գրեթե նույնքան մնացած ականադաշտերի մասին:
Two more minefields completed today! Only 99 remain until we deliver a #MineFreeNK . #SafeSteps #NagornoKarabakh pic.twitter.com/m0LaoXbZ1G
— HALO NagornoKarabakh (@HALO_NK) March 17, 2017
«Հալո Թրաստին» օժանդակում է նաև ԱՄՆ կառավարության օժանդակության USAID ծրագիրը, սակայն Բերձորում (Լաչին) կատարված ականազերծման աշխատանքները դուրս էին USAID-ի օժանդակության շրջանակներից: Էշլի Բոդին սա բացատրում է նրանով, որ իրենք զգուշավորություն են ցուցաբերում այս տարածքների վերաբերյալ՝ քաղաքական խնդիրների պատճառով: Այս թեմայով Բոդին նշում է, որ USAID-ի օժանդակությունները վերաբերում են միայն նախկին ԼՂԻՄ-ի տարածքում իրականացվող ականազերծման աշխատանքներին:
Ինչ վերաբերում է Բերձորում անցկացվող ականզերծման աշխատանքներին, ապա դրա համար գումարը հավաքում է OneArmenia կազմակերպությունը: (Այս մասին առավել մանրամասն կարող եք կարդալ այստեղ):
«Հալո Թրաստի» աշխատանքներին ներգրավված են նաև տեղի բնակչությունից, որոնք օգնում են ականազերծման աշխատանքներում, ինչպես նաև տրամադրում են ականապատ տարածքների մասին տեղեկություններ: Ներկայումս «Հալո Թրաստը» ունի շուրջ 170 աշխատակից:
Տեղի բնակչության հետ տարվում են նաև աշխատանքներ, մասնավորապես՝ կրթելու և պատրաստելու ուղղությամբ: Իսկ 2020 թվականին ականազերծման աշխատանքները ավարտելուց հետո, ըստ Էշլի Բոդիի, արդեն փորձ կուտակած տեղացի մասնագետները հնարավորություն կստանան ներգրավվելու «Հալո Թրաստի», ինչպես նաև ականազերծմամբ զբաղվող այլ կազմակերպությունների աշխատանքներին: