Թուրքիայի զինված ուժերի ԳՇ կայքը հրապարակել է ԶՈւ թվաքանակը՝ 2017 թ. փետրվարի 1-ի դրությամբ: Ըստ այդ տվյալների՝ թուրքական զինուժի և պաշտպանության նախարարության անձնակազմը 401.199 է, որից 38915-ը քաղաքացիական աշխատողներ են, իսկ 362.284-ը՝ զինծառայողներ։
Համաձայն հրապարակված տվյալների՝ թուրքական զինուժում գեներալների և ծովակալների թիվը 201 է: Հունվարին հրապարակված տվյալների համեմատ 2 գեներալ պակասել է: Իսկ առհասարակ՝ 2016 թ. հուլիսին՝ Թուրքիայում ռազմական հեղաշրջման փորձից առաջ, թուրքական զինուժում առկա գեներալներից և ծովակալներից 223-ը ներկայում այլևս չի ծառայում, շուրջ 150-ն անցնում են տարբեր քրեական գործերով:
Սպաների թիվը 25728 է, ենթասպաների թիվը՝ 64655-ը: Այս երկու տվյալներում ևս նախորդ ամսվա համեմատ գրեթե փոփոխություն չկա: Պրոֆեսիոնալ սերժանտների (հատուկ պայմանագրային եֆրեյտորներ) թիվը հունվարի դրությամբ 47167 է: Այս երեք տեսակի ծառայողների թվաքանակն էլ նվազել է գրեթե նույն չափով՝ 3-400 զինծառայող:
Այսպիսով՝ շուրջ 1500-ով նվազել է Թուրքիայի ԶՈւ պրոֆեսիոնալ անձնակազմի թվաքանակը (~150 հազար): Սակայն փոխարենը շուրջ 4 հազարով աճել է զորակոչված անձնակազմը՝ 2017 թ. փետրվարի 1-ի դրությամբ կազմելով 208.515 զինծառայող:
Թուրքիայի ԶՈւ ԳՇ և ՊՆ անձնակազմը 2017 թ. փետրվարի դրությամբ. աղյուսակ.
| Զինվորական կոչում | ԳՇ, ՊՆ, Ցամաքային ուժեր, ՌԾՈւ, ՌՕՈւ | Ժանդարմերիա, Առափնյա անվտանգություն |
| Գեներալ, ծովակալ | 201 | – |
| Սպաներ | 25.728 | – |
| Ենթասպաներ | 64.655 | – |
| Պայմանագրային ժանդարմներ | — | – |
| Հատուկ պայմանագրային եֆրեյտորներ | 47.167 | – |
| Պայմանագրային եֆրեյտորներ, շարքայիններ | 16.018 | — |
| Պրոֆեսիոնալ անձնակազմ | 153.769 | – |
| Զորակոչված անձնակազմ | 208.515 | – |
| Քաղաքացիական կազմ (ՊՆ, ԶՈւ) | 38.915 | – |
| Ընդհանուր թվաքանակ | 401.199 | – |
| Պայմանագրային զին. թիվը տոկոսով | 42% | – |
Pingback: Ռազմաշաբաթ. Տարածաշրջան. 29 հունվար – 4 փետրվարի, 2017 | Ռազմ.info