Թուրքիայի ԶՈւ ԳՇ կայքը հրապարակել է զինված ուժերի թվաքանակը՝ 2017 թ. հունվարի 2-ի դրությամբ: Ժանդարմերիայի և առափնյա անվտանգության անձնակազմերի մասին տվյալներ կրկին չեն հրապարակվել, քանի որ այդ զորքերն արդեն ամբողջովին ՆԳՆ ենթակայության տակ են։
Այսպիսով՝ Թուրքիայի ԶՈւ և պաշտպանության նախարարության անձնակազմը 398.513 է, որից 39240-ը քաղաքացիական աշխատողներ են, իսկ 359.273-ը՝ զինծառայողներ։
Համաձայն հրապարակված տվյալների՝ թուրքական զինուժում գեներալների և ծովակալների թիվը 203 է: Դեկտեմբերին հրապարակված տվյալների համեմատ փոփոխություն չկա, սակայն, ինչպես արդեն նշել էինք, հուլիսին՝ Թուրքիայում ռազմական հեղաշրջման փորձից առաջ, թուրքական զինուժում առկա գեներալներից և ծովակալներից 221-ը ներկայում այլևս չի ծառայում, շուրջ 150-ի նկատմամաբ դատավարություն է ընթանում:
Սպաների թիվը 26278 է, ենթասպաների թիվը՝ 64999-ը: Այս երկու տվյալներում ևս նախորդ ամսվա համեմատ փոփոխություն չկա: Պրոֆեսիոնալ սերժանտների (հատուկ պայմանագրային եֆրեյտորներ) թիվը հունվարի դրությամբ 47570 է, ինչը դեկտեմբերի համեմատ պակաս է ընդամենը շուրջ 500-ով:
Նշենք, որ ռազմական հեղաշրջման փորձից հետո Թուրքիայում հայտարարված արտակարգ դրության պայմաններում կառավարության որոշմամբ արդեն շուրջ 20 հազարից ավել զինծառայող է հեռացվել միայն ցամաքային, տռազմածովային և ռազմաօդային ուժերից:
Զորակոչված անձնակազմի թվաքանակը դեկտեմբերի համեմատ պակասել է շուրջ 1400-ով, իսկ գրեթե նույնքանով էլ՝ ընդհանուր անձնակազմը։ Պրոֆեսիոնալ անձնակազմի թավաքանակը մնացել է գրեթե նույնը՝ շուրջ 150 հազար:
Թուրքիայի ԶՈւ ԳՇ և ՊՆ անձնակազմը 2017 թ. հունվարի դրությամբ. աղյուսակ.
Զինվորական կոչում | ԳՇ, ՊՆ, Ցամաքային ուժեր, ՌԾՈւ, ՌՕՈւ | Ժանդարմերիա, Առափնյա անվտանգություն |
Գեներալ, ծովակալ | 203 | – |
Սպաներ | 26.278 | – |
Ենթասպաներ | 64.999 | – |
Պայմանագրային ժանդարմներ | — | – |
Հատուկ պայմանագրային եֆրեյտորներ | 47.570 | – |
Պայմանագրային եֆրեյտորներ, շարքայիններ | 16.149 | — |
Պրոֆեսիոնալ անձնակազմ | 155.199 | – |
Զորակոչված անձնակազմ | 204.074 | – |
Քաղաքացիական կազմ (ՊՆ, ԶՈւ) | 39․240 | – |
Ընդհանուր թվաքանակ | 398.513 | – |
Պայմանագրայինների թիվը տոկոսով | 43% | – |
Pingback: Թուրքիայի ԶՈւ ԳՇ և ՊՆ անձնակազմը 2017 թ. փետրվարի դրությամբ. աղյուսակ | Ռազմ.info